Atualità
L’ Assessur Mussner incunta i artejans dla Val Badia por splighé damì la lege nöia sön i laûrs publics
OSP - Incuntada di artejagn dla Val Badia cun l’assessur Mussner y le diretur dl LVH Hanspeter Munter a Piculin. I critêrs nüs dess dè la poscibilité ince ales dites de Südtirol de laurè deplü te Südtirol Sot a 1.000.000 d’Euro mëssel gnì invié almanco 10 dites cualificades, da 1 – 1,5 miliuns mëss le bando de gara gnì publiché por 10 dis söl albo dl’aministraziun che scrì fora i laûrs, dessura ince sön chël dla Provinzia y sön so sito informatich.
Por en lönesc, ai 30 de jügn à l’Uniun di artejans APA/LVH dla Val Badia cun so presidënt Albert Moling invié a na incuntada por splighé damì les consecuënzes dla lege nöia sön i laûrs publics (modaziuns ala lege n. 6 dl 1998) por i artejans, lege presentada dal assessur Mussner ti ultims mëisc y jüda en forza ai 18 de jügn. Invié él inće gnü le Diretur dl LVH y aconsiadù provinzial Hanspeter Munter.La lege n. 6 dl 1998 che scrì dant les normes por le dè ia y l’esecuziun di laûrs publics odô ćina sëgn danfora l’assegnaziun di laûrs - che aladô dla soma dl laûr – messô gnì scrić fora cun formalitês desvalies – do criters de prisc y nia tan de cualité y afidabilité dla dita. Te chësta ocajiun à l’ assessur y le diretur dl LVH orü informè personalmënter artejans sura chëstes mudaziuns y les consecuënzes por ëi.
Ara se trata de na modaziun de lege che dess portè vantaji ales dites da chilò.
Chësc é n tema dër sintì sides dai artejans co inće dales atres dites de Südtirol.
La modaziun plü importanta che vëgn dant tla lege vëiga danfora nia ma plü le prisc sciöche su elemënt por l’assegnaziun, mo inće critêrs de cualité y d’organisaziun dla dita. Aladô dla soma di laûrs vëgnel inće preodü la forma de invié les dites cualificades y la publicaziun dl band de gara. Insciö pol gnì dè ia laûrs ćina 50.000 Euro tres trataziun direta cun üna o deplü dites che l’Aministraziun se chir instëssa fora. Por somes sura 50.000 – 1.000.000 Euro ne mëssel nia plü gnì publiché le bando de gara sc’al vëgn invié almanco 10 dites cualificades por i laûrs che vëgn fać, por laûrs sot a 2.500.000 Euro mëss le bando de gara gnì publiché por 10 dis söl albo dl’aministraziun che scrì fora i laûrs, sura chësta soma inće sön l’albo y sito informatich dla Provinzia.
L’esperiënza à desmostrè che le prisc da su sciöche criter ne basta nia por na buna esecuziun di laûrs, che mëss ester le fin prinzipal de vigni opra publica. Les gran riduziuns de prisc che vëgn fates por ciafè de gragn laûrs porta gonot dificult1es: al mëss gnì conzedü variantes, revijiuns de prisc y vëgn daurì riserves por la conclujiun de laûrs.
Al vëgn porchël preodü critêrs de cualité y organisaziun do chi ch’al vëgn dè punć por na assegnaziun de n laûr. Chësc ó dì p. ej. ćiarè inće ai laûrs che la dita à fat ti ultims 5 agn y al vëgn preodü la presentaziun dl organigram (personal) che la dita à a sües dependënzes, la competënza tecnica o specifica, le tëmp d’esecuziun y i.i.
La garanzia bancara preodüda é gnüda arbassada al 10 % dl prisc contratual cun n valgünes spezificaziuns.
Pro l’incuntada él gnü baié inće di prighi che vigni modaziun se porta para. Insciö él gnü dè espresciun ala preocupaziun che cun chisc critêrs podess tres les medemes dites ciafè i laûrs. L’assessur Mussner à dè le consëi ales aministraziuns locales de laurè do n prinzip de rotaziun pro les dites che à plü o manco les medemes cualifiches. Le tëmp d’esecuziun di laûrs vëiga valgügn rapresentanć di artejans massa cürć y ai mët en dificulté les dites. Problems él datrai cun i tecnics responsabli dl’esecuziun di laûrs (proietanć y direturs di laûrs) püch presënć sön le post che lascia i artejans tröp da susc da tó inće de ries dezijiuns.
L’assessur à stlüt jö la sëra informan inće sön n “Forum por i laûrs publics” che tol ite rapresentanć de dötes les categories y che dess tignì la discusciun daverta por podëi tres miorè la normativa che se damana gran atenziun te n marćé che se müda tan debota.
OSP
