Atualità
Concurs publich por ladins: Cater posć por colaboradus aministratifs
L’Aministraziun provinziala á publiché incö, ai 11 de forá, n concurs por cater posć por colaboradus aministratifs resservá ai ladins. I posć é a tëmp indeterminé, dui a tëmp plëgn y dui a tëmp parzial. An pó se scrí ite cina ai 2 de merz dl 2016.
I posć che é gnüs scric fora é: un n post tl Departimënt Scora y Cultura ladina (post a tëmp plëgn), un n post tla direziun scolines „Ladinia“ a Urtijëi (post a tëmp plëgn) y dui posć tl Lizeum artistich „Cademia“ a Urtijëi (un n post da 28 ores y l’ater da 19 ores). Düc i posć é a tëmp indeterminé y dla sesta cualifica funzionala. Por podëi tó pert al concurs mësson avëi stlüt jö la scora alta (ejam de Stat, denant "ejam de maturité") y avëi l’atestat de trilinguism B. Al concurs pó ma fá para che che fej pert dl grup linguistich ladin.
Les domandes de amisciun al concurs mëss gní dades jö tl Ofize Assunziun personal alplü tert dales 12.00 de en mercui ai 02 de merz dl 2016. Al é preodü na proa scrita y na proa a usc. Por informaziuns plü avisa sön les modalités dl ejam y sön co fá domanda ciarede prëibel sön la plata internet: http://www.provinz.bz.it/personal/download/4.1_4_Verw_sach_lad_kd.pdf
Por informaziuns plü monüdes pó i candidac ince contaté l’Ofize Assunziuns personal (Palaz 8, via Renon 13, 39100 Balsan), numer de telefon: 0471 412115 o tres email kathrin.defant@provinz.bz.it
rc
