Atualità
Resultac' dles scores ladines
OSP - Chisc dis à les scores stlüt les portes do i ejams finai. L'Intendënza ladina fej na bilanz di resultac': di 45 candidac' interns dles cinch scores altes à düc' arjunt la promoziun cun l'ejam de stat. Tles scores mesanes à 203 di 208 scolares y scolars che à podü fà l'ejam arjunt la promoziun. Di 1300 danter scolares y scolars dla scora elementara é 1281 passà.
Tl ann de scora 2002/03 à 1300 scolares y scolars frecuentè la scora elementara, 675 la scora mesana y 226 studënc' y studëntes üna dles cinch scores altes dles döes valades ladines (ITC da La Ila, Lizeum da La Ila, ITC de Urtijëi, Scora d'ert de Urtijëi y de Sëlva). L'assessur ladin é cuntënt suradöt cun i resultac' dles scores altes: di 45 studënc' interns à düc' superé l'ejam de stat. Tl ITC da La Ila él stè en chësc ann por le pröm iade tla storia de chësta scora le mascim resultat de 100/100 da pert de n studënt y na studënta. N resultat mascim él ince stè tl ITC de Urtijëi y tla Scora d'ert de Urtijëi.Tla scora mesana à 203 di 208 studënc' che à podü se presentè al ejam de terza ince superé chësta proa, chël ó dì che ma le 3,79 % di scolars y dles scolares n'á nia arjunt chësc travert de oblianza. Tles prömes y secundes tlasses él gnü valuté indöt 491 scolars: 13 n'é nia passà. "Ala fin dla terza tlassa dla scora mesana desmostra i scolars na buna conoscënza di cater lingac d'insegnamënt", dij l'ispetur dles scores ladines Lois Ellecosta che à acompagné te süa funziun düc' i ejams dla scora ladina. I resultac' dla scora mesana po gnì paredlà cun chi dl ann passè, dij inant l'ispetur ladin. 29 scolars à arjunt le resultat mascim "ezelënt" y 38 la nota "dër bun", chësc é le 32 % sön le total di scolars ch'à fat l'ejam che à stlüt jö dër bun la scora mesana.
Di 1300 danter mituns y mitans dles cinch tlasses dla scora elementara n´'él passè 1281.
Dai dac' dl'Intendënza ladina vëgnel fora resultac' da ester cuntënc' che po se mosorè cun i resultac' nazionai.
OSP
