Atualità
Euregio: i presidënc s’incunta a Viena cun le presidënt y la ministra
Le presidënt dla Provinzia Arno Kompatscher sará indoman (ai 16 de forá) a Viena adöm cun i suranstanc dl Trentin y dl Tirol. Al é sön le program döes incuntades cun la ministra por les chestiuns internes Johanna Mikl Leitner, sön la chestiun di migranc y di controi ai confins, y daldô cun le presidënt dla Republica dl'Austria Heinz Fischer.
Sciöche anunzié do la reuniun dl GECT dl’Euregio s’incunta i presidënc Arno Kompatscher, Ugo Rossi y Günther Platter cun les rapresentanzes di governs dla Talia y dl’Austria por traté la problematica di controi di migranc ai confins danter i dui Stac. Indoman él insciö preodü na pröma incuntada a Viena cun la ministra por i afars interns Mikl Leitner, a chëra che i suranstanc dl’Euregio ti presentará la deliberaziun aproada incö y la posiziun dles trëi provinzies sön la chestiun.
Le presidënt Kompatscher á ince telefoné incö cun le Presidënt dla Republica austriaca Heinz Fischer y á concordé n termin por indoman: „Le presidënt Fischer monitorëia cun atenziun le svilup dl’Euregio y indoman sarál l’ocajiun por ti presenté nosc punt d’odüda sön la situaziun atuala“, insciö Kompatscher.
rc
