Atualità
Dala Junta: ofize provinzial nü por le Parch dl Stelvio
N ofize provinzial nü ará le compit da manajé la gestiun y aministraziun de dötes les competënzes dla Provinzia de Balsan söl teritore provinzial che reverda le Parch nazional dl Stelvio. L'istituziun de n ofize aposta é gnüda tuta incö dala Junta provinziala sön proposta dl’assessuria Waltraud Deeg tl contest de n valgönes mudaziuns dla strotöra aministrativa y de direziun.
Al jará en forza ai 23 de forá la norma d’atuaziun söl Parch nazional dl Stelvio che ti atribuësc ala Provinzia de Balsan la competënza de gestiun sön la pert südtiroleja dl parch. La Junta provinziala á insciö stabilí incö, sön proposta dl’assessuria competënta Waltraud Deeg, da istituí n ofize aposta por le Parch nazional dl Stelvio a na manira da podëi ince garantí le funzionamënt di compic nüs dla Provinzia te chësc setur. Chëstes sará les inciaries dl’istituziun nöia: planifiché y manajé le Parch, elaboré le plann y le regolamënt, fá ativités de suraverda, control, informaziun, educaziun ambientala y polizia aministrativa, manajé les staziuns y i zëntri de vijita dl parch nazional dl Stelvio. L’ofize nü gnará integré tla Repartiziun natöra, paesaje y svilup dl teritore y sará insciö le sostitut dl ofize atual dl parch natural a Glurns.
La deliberaziun aproada incö (ai 16 de forá) dala Junta provinziala prevëiga implü la reorganisaziun de n valgönes competënzes tles Repartiziuns Europa, Cultura taliana y Promoziun dl stüde. Por ci che reverda la Repartiziun Europa él gnü stabilí la reorganisaziun y le spostamënt de n valgönes competënzes. Na mudaziun él ince gnü a se le dé danter les Repartiziuns Cultura taliana y Promoziun dl stüde: cina sëgn se fistidiâ la Repartiziun Promoziun dl stüde di contribuc de sostëgn por imparé n secundo lingaz o n lingaz forest por i grups linguistics ladin y todësch, la Repartiziun Cultura taliana fajô le medemo laur por le grup linguistich talian. Da sëgn ará la Repartiziun Cultura taliana les funziuns de consulënza sön i iadi de stüde foradecá, les sovenziuns a bëgn dl stüde di lingac fora dla Provinzia gnará indere manajades tl dagní dala Repartiziun Promoziun dl stüde por düc trëi i grups linguistics.
rc
