Atualità
Dala Junta: aprovaziun dla domanda formativa tl setur sozial
Por ti jí adincuntra al aumënt de domandes do operadus cualificá tl setur sozial á la Junta provinziala aprové incö (ai 16 de forá) le plann trienal aladô di bojëgns formatifs tles scores provinziales „Hannah Arendt“ y „Emmanuel Lévinas“ y dl’Université da Balsan.
Les esigënzes de sostëgn nöies por les families y l’aumënt dl’eté mesana dla popolaziun é döes dles guajes dl aumënt dla domanda do operadus cualificá tl setur soziosanitar. Chëstes profesciuns é nezesciares y se damana na formaziun adatada por podëi ademplí ales ghiranzes di sorvisc soziai, dles comunités raionales, dles cooperatives y dles organisaziuns soziales, Te chësc setur é le personal aumenté ti ultims cinch agn (2010 – 2015) da 7328 a 7890 operadus, cun indöt 562 operadus y operadësses implü.
Incö á la Junta provinziala aprové insciö le Plann trienal aladô dla domanda formativa 2016 – 18 por le setur sozial y che é gnü elaboré da n grup de laur aposta. Insciö él preodü cina al 2018 la formaziun de indöt 180 operadus y operadësses soziales y 80 operadus y operadësses soziosanitares vigni ann tles döes scores provinziales. Implü él sön le program tl’Université da Balsan n plann de formaziun por indöt 30 assistënc y assistëntes soziales, 40 esperc y espertes de pedagogia y 15 studënc y studëntes dl stüde master tl’inovaziun y archirida ti laurs soziai.
En confrunt al plann da denant él preodü n pice aumënt dla domanda de operadus soziai, n smendrimënt di operadus soziosanitars y n ampliamënt di esperc de pedagogia soziala. „I operadus y les operadësses cualificades é n pilaster por döt le setur sozial tl Südtirol, deache ai y ares garantësc n contribut important por daidé les porsones che á debojëgn de cura y assistënza“, insciö l’assessuria por la sanité Martha Stocker che recorda ince l’importanza da avëi porsones che se dá jö cun na profesciun tl setur sozial y soziosanitar.
rc
