Atualità
Dala Junta: trus dles rodes, convenziun cun la Rëi dla ferata taliana
Incö (al pröm de merz) á la Junta provinziala dit de sce ala stipolaziun de na convenziun cun la Rëi dla ferata taliana RFI (Rete Ferroviaria Italiana Spa) por jí inant cun la realisaziun de proiec de mioramënt dla mobilité dles rodes tres trus dles rodes nüs dlungia les linies dla ferata.
La Provinzia vá inant cun le program de svilup dla rëi di trus dles rodes publics, dl barat intermodal y dl’adoranza combinada dla ferata y dla roda. Incö á la Junta aprové la stipolaziun de na convenziun nöia cun la Rëi dla ferata taliana che gnará sotescrita dal Presidënt dla Provinzia Arno Kompatscher. “La realisaziun de trus dles rodes dlungia les linies dla ferata se porta pro tl Südtirol porvia de süa situaziun geografica fata de valades strëntes y de munts”, á splighé Kompatscher do la sentada dla Junta.
La stipolaziun dla convenziun danter la Provinzia y la Rëi dla ferata taliana portará dantadöt pro a mioré la rëi di trus dles rodes dlungia la linia dla ferata Balsan-Maran y Franzensfeste-Sanciana, cun lapró ince le toch do Sanciana cina sön le confin de Stat. Ince la Rëi dla ferata taliana á desmostré interes por la realisaziun de trus dles rodes dlungia les linies dla ferata por ti podëi insciö pormez plü saurí ala ferata ti caje de bojëgn de manutenziun y de intervënc de prescia.
La convenziun vëiga danfora n valgönes condiziuns: por realisé trus dles rodes te toc particolarmënter complicá dl teritore él la Rëi dla ferata taliana che mëss dé so consëns por smendrí les destanzes cina a n minim de 3 metri danter le tru dala roda (cun lapró ince la si de spartiziun) y les scines plü daimpró. La Provinzia ti conzed ala Rëi dal ferata taliana da d’adoré i trus dles rodes por fá les ativités de suraverda, manutenziun y intervënt de prescia sön la linia dla ferata y garantësc implü ince che al vëgnes fat passaji tles sis che despartësc i trus dles rodes dala ferata.
Ti ultimi vint agn á la Provinzia investí presciapüch 150 miliuns de euro por trus dles rodes extracomunai a destanza lungia (Val d’Adesc, Val d’Isarch, Val de Puster, Val Venosta y i.i.) y á svilupé na rëi de presciapüch 500 km che scona l’ambiënt, stimolëia la jënt da tó la roda sciöche meso por se sposté tla vita da vigni dé y porta pro a cherié n turism dla roda cun na faziun economica nia da püch.
USP
