Atualità
Dala Junta: laboratore sensorial nü ala Laimburg
L’analisa scientifica di produc „made in Südtirol“ sará le compit prinzipal dl laboratore sensorial nü dla Laimburg. La Junta provinziala ti á dé incö süa aprovaziun al program volumetrich dl laboratore che ará na spëisa de 600mile euro y che gnará cofinanzié tres le FESR. L’assessur Schuler á presenté la proposta.
Le plann d’aziun por l’archirida y la formaziun ti seturs dl’agricoltöra y dles sciënzes agro-alimentares é gnü aprové l’ann passé de setëmber dala Junta provinziala y un di investimënc preodüs reverda la realisaziun de n laboratore sensorial. Le laboratore nü gnará realisé tl Zënter de sperimentaziun dla Laimburg, sciöche preodü dala deliberaziun aprovada incö al 1 de merz dala Junta provinziala sön proposta dl assessur Arnold Schuler. L’investimënt sará de püch sura 600mile euro y al é preodü n cofinaziamënt da pert dl Fonds europeich de svilup regional (FESR). „L’archirida, la sperimentaziun y la formaziun é i pilastri fondamentai por le svilup dl’agricoltöra südtiroleja“, á sotligné l’assessur Schuler. Le presidënt Arno Kompatscher á ajunté che „al se trata de n investimënt por le dagní de nosta tera. Por merit de na colaboraziun strënta cun düc i partnes orunse svilupé inant chësc setur te na direziun tres plü sostenbila“.
L’analisa sensoriala é na materia scientifica che mosöra, analisëia y ti dá n’interpretaziun ales sensaziuns che vëgn registrades dai edli, dal nes, dala bocia, dles orëdles y dales mans y dal corp. Al basta chësta definiziun por capí l’importanza dla materia che sará tl zënter dl laboratore nü cun n’atenziun particolara dantadöt ai produc dl’agricoltöra südtiroleja y ala sconanza di consumadus de chisc produc.
rc
