Atualità
Dala Junta: conzet nü por l’assistënza sanitara tles residënzes por seniors
L’assistënza sanitara di ghesć dles residënzes por seniors tl Südtirol gnará miorada tres na presënza costanta y strotorada de doturs: chësc é l’obietif prinzipal dla delibera aproada incö (al pröm de merz) dala Junta provinziala. Aladô dles dimenjiuns dla strotöra ará i seniors n’assistënza cun dai dui ai cinch doturs de medejina generala.
Cina sëgn gnô l’assistënza sanitara dla jënt atempada garantida dal dotur de familia ince do che ai rovâ tles ciases de palsa o de na strotöra por seniors dla Provinzia. De conseguënza messâ insciö n gran numer de doturs de familia ince se fistidié dl’assistënza sanitara tles ciases de palsa. Cun la regolamentaziun nöia aprovada incö (al 01/03) dala Junta provinziala y concordada denant cun la rapresentanza sindacala di doturs südtirolej vëgn sëgn le proiet amplié a döta la rëi provinziala. Tl dagní gnarál insciö formé n team da almanco dui cina al mascimo cinch doturs, sön la basa dles dimenjiuns dla strotöra por seniors, por garantí l’assistënza sanitara ai ghesć tles ciases de palsa. Le paiamënt fat fora sará de 80 euro al’ora cun ince les prestaziuns sanitares.
„I doturs dles ciases de palsa sará les porsones de referimënt por düc i ghesć y ince por i familiars y le personal d’assistënza. N numer tler y definí de doturs che laora tles residënzes conzed ince da strotoré n’assistënza plü costanta“, sotlignëia l’assessuria provinziala Martha Stocker che á presenté la deliberaziun. L’assistënza sanitara tles ciases de palsa é preodüda sciöche ativité de laur autonom y vëgn scrita fora tres n concurs dales strotöres interessades.
rc
