Atualità
Dala Junta: inrescida y inovaziun, 134 miliuns por ënc y impreses
La Junta provinziala á aprové incö (al 1. de merz) le program 2016 por l’inrescida y l’inovaziun. Le budget dla Repartiziun inovaziun, inrescida y université é de 134 miliuns de euro. Al pó ti rové pormez al sostëgn finanziar ënc de inrescida, impreses o proiec de cooperaziun danter aziëndes.
“N plann che á l’obietif da mët te na rëi l’archirida cun l’economia”, á dit le presidënt Arno Kompatscher. Cina sëgn prevëiga la Provinzia de Balsan por chësc setur le 0,6 porcënt dl PIL, “mo i sun tl lauré por aumenté la dotaziun, cun investimënc tla cualité ciaran da ester a öna cun dötes les perts interessades”, á ajunté Kompatscher. Le budget dla Repartiziun provinziala á indöt 134 miliuns de euro, 30 implü co l’ann passé: zirca 62 miliuns de euro é a desposiziun di istituc academics y de formaziun alta, 40 miliuns por les strotöres de inrescida (danter Eurac, IIT, Zënter de Laimburg y Fraunhofer Institut). La inrescida se conzentrëia dantadöt sön 4 raiuns de spezialisaziun: energia y ambiënt, tecnologies agroalimentares, tecnologies alpines, tratamënc de cura naturalai y tecnologies medejinales.
Al’inovaziun tles impreses él destiné diretamënter 33,3 miliuns de euro. Ti ultimi agn s’á le 50% dles aziëndes dl Südtirol porvé tl setur dl'inovaziun y le 30% á metü a jí cun suzes n prozes o n proiet inovatif. Dl 2015 él gnü dé jö 217 domandes dales impreses, zirca 60 de plü co le 2014: 162 nen él gnü aprové.
Le sostëgn reverda danterater l’ativité de inrescida y svilup, stüdi de fatibilité por l’inovaziun, dërc de proprieté industriala, sistems de management, sorvisc de consulënza, inovaziun de prozes o dl’organisaziun. Ince dl 2016 gnarál scrit fora na bandida daverta por assunziun o metüda a desposiziun de personal dër cualifiché tles aziëndes, cun n stanziamënt publich dala Provinzia por sostigní le cost dl personal. Al é ince preodü na bandida por les impreses start up cun n gran contignü tecnologich, che mët a desposiziun complessivamënter n miliun de euro. Le program dl 2016 vëiga danfora ince le sostëgn di proiec trasversai a bëgn dles impreses che fej pert dla agenzia por l’economia nöia IDM, chël ó dí scomenciadies de cluster por l’inovaziun, transfert tecnologich, consulënza por start up.
A livel dl monitoraje dles ativités sostignides, gnarál organisé adöm cun les perts che fej para incuntades periodiches por ciaré tan inant che an é cun i proiec y al gnará definí n sistem de control di resultac arjunc. Chësta é ince öna dles condiziuns metüdes dala Comisciun dla UE por podëi s’anuzé inant dles sovenziuns dl program FESR che finanziëia i investimënc a bëgn dla chersciüda y dl’ocupaziun. Le program dl 2016 sotrissëia che la cornisc ideala por sostigní le prozes de chersciüda dla inrescida y dl’inovaziun sön le teritore é le Parch tecnologich a Balsan süd, olache al gnará metü a mez dl 2017 i laboratori y les strotöres d’inrescida de ULB, Laimburg y Eurac.
Por fá conësce damí l’importanza dla inrescida por le svilup dl Südtirol, ince dl 2016 él preodü manifestaziuns d’informaziun y la “Nöt lungia dl’inrescida”.
USP
