Atualità
Aeroport de Balsan: consultaziun popolara ai 12 de jügn
La consultaziun popolara söl aeroport de Balsan gnará tigní en domënia ai 12 de jügn: le decret che alda lapró dl Presidënt dla Provinzia é gnü publiché incö (al 1 de merz) sön le Boletin ofizial dla Regiun.
En domënia ai 12 de jügn gnarál tigní le referendum consultif sön l’aeroport de Balsan sön la basa dl decret dl Presidënt dla Provinzia publiché söl BUR 9/2016. Le contignü dla consultaziun popolara, deliberada dal Consëi provinzial de dezëmber dl 2015 sön proposta dl presidënt dla Provinzia Arno Kompatscher, reverda le dessëgn de lege cun les desposiziuns sön l’aeroport de Balsan presenté dala Junta. La domanda sará chëra da aprové o nia aprové le ddl „Normes sön l’aeroport da Balsan“. Le test dl ddl gnará mené inant ai Comuns che mëss le taché fora 30 dis dan le 12 de jügn y che an pó lí do online sot a: http://www2.landtag-bz.org/documenti_pdf/IDAP_367074.pdf
Le ddl dla Junta é partí sö te sis articui y prevëiga la basa por le funzionamënt de n aeroport che gniss finanzié y manajé sön dorada lungia ma sce al gnará garantí la funzionalité y n andamënt economich positif dla strotöra. Les desposiziuns sön l’aeroport definësc re na manira tleres i obietifs de svilup y ti scri ince dant ala Junta provinziala da eliminé le finanziamënt publich tl caje che les condiziuns dl plann strategich ne vëgnes nia tignides ite. Danter i critérs él inserí n numer minimo de 170 mile passajiers dal 2022 inant. Le dessëgn de lege stabilësc ince le cofinanziamët dla Provinzia ai cosć dl aeroport de Balsan (mascimo 2,5 miliuns al ann) cina l’ann 2022 y daldô ne pó le contribut publich nia plü superé la soma de 1,5 miliuns de euro.
rc
