Atualità
Comité etich provinzial sön le tema dl’eutanasia: film y debatüda ai 09/03
L’eutanasia y i aspec desvalies che reverda la tematica sará tl zënter dla secunda sëra publica metüda da jí dal Comité etich provinzial en mercui ai 9 de merz a Balsan. En colaboraziun cun le Filmclub gnarál mostré le film“Am Ende ein Fest“ por todësch. L’entrada é debann.
Le Comité etich provinzial mët da jí por en mercui ai 9 de merz dales 20.00 tl Filmclub de Balsan le film „Am Ende ein Fest“ por todësch. L’entrada ala sëra é debann. Le film cunta la storia de n grup de amisc de na ciasa de palsa a Gerusalemme che svilupëia na mascin por l’eutanasia por daidé n amaré terminal. Cun le tëmp él tres plü porsones che vëgn a conescënza de chësta mascin y ti damana al grup de amisc da podëi l’adoré, cun la conseguënza che l’adoranza de n te meso devënta na chestiun de prinzip.
„Cun l’organisaziun dles sëres y di films a tema orunse renforzé la discusicun sön temesc che trata chestiuns etiches y sensibilisé la popolaziun da se dé jö cun chëstes tematiches“, spliga le presidënt dl Comité etich provinzial, le primar Herbert Heidegger. „La proieziun dl film nes pita la poscibilité da traté la tematica te na manira nia convenzionala. Propi tl mëteman y ala fin dl percurs de vita nes fajunse n valgönes domandes etiches cun chëres che nia ma la sozieté mo ince le singul mëss se dé jö“, ajuntëia l’assessuria provinziala Martha Stocker.
Ala fin dla proieziun gnarál organisé na discusciun publica a chëra che al tolará pert Irmgard Spiess, assistënta tl setur dles cures paliatives, la suranstanta sanitara tl setur de terapia intensiva Bernadetta Moser y le teologh moral Martin Lintner.
rc
