Atualità
Dala Junta: plü personal sajonal por i museums provinziai
La Junta provinziala á aprové incö (ai 08/03) sön proposta dl assessur Florian Mussner na delibera che alza la capiënza orara dl personal sajonal dl’Aziënda Museums provinziai. A pert le Museum archeologich y le Museum de Sciënzes naturales, che é daverc döt l’ann, dauriará ince tosc les atres set strotöres sües esposiziuns ai vijitadus tles proscimes edemes.
I Museums provinziai é indöt nü y garantiará ince por le 2016 indô a düc i vijitadus n’oferta ampla y desvalia sön döt le teritore provinzial: al se trata dl Museum archeologich, dl Museum dles mineores, dl Museum Ladin, dl Museum dles sciënzes naturales, dl Museum dla Ciacia y dla Pëscia, dl Touriseum, dl Museum dles usanzes y tradiziuns, dl Museum dl vin y dl Museum storich-cultural de Ciastel Tirol. I dui museums che á süa sënta a Balsan, le Museum archeologich y le Museum de sciënzes natureales, é les uniches döes strotöres museales che á davert döt l’ann y ti atri museums laora la maiú pert di colaboradus cun contrac sajonai.
L’ann passé ê la capiënza totala dles ores a desposiziun de indöt 79mile unités che ti corespogn a 43,5 posć de laur a tëmp plëgn (38 ores al’edema por 11 mëisc). Por le 2016 á la Junta provinziala tut la dezijiun sön proposta dl assessur competënt Florian Mussner da alzé le numer de ores a 83.200 unités. „La sajiun dla maiú pert di museums mët man da Pasca, y tignin cunt che la zelebraziun dla festa de Pasca é scialdi adora chësc ann él gnü tut la dezijiun de conseguënza da aumenté les ores da mëte a desposiziun dl personal“, á sotligné le presidënt dla Provinzia Arno Kompatscher.
rc
