Atualità
Dala Junta: pröma tlamada por i proiec Interreg, dotaziun de 30 miliuns
La Junta provinziala á dé incö (ai 08/03) süa aprovaziun ala pröma tlamada por la presentaziun di proiec tl contest dl program de cooperaziun INTERREG V A Talia-Austria (2014-2020) Por chësc pröm call él a desposiziun 30 miliuns de euro de finanziamënt europeich dal program por le svilup regional FESR.
„L’obietif dl program Interreg V-A Talia-Austria é chël da renforzé la cooperaziun transfrontaliera tles zones de confin. Al vëgn finanzié proiec de plü regiuns cun chi che les realtés locales de confin laora adöm por ciafé soluziuns a problems y por promöie n svilup ecuilibré y sostenibl“, á recordé le presidënt dla Provinzia Arno Kompatscher incö do la sentada dla Junta.
Le program de cooperaziun döra cina dl 2020 y á a desposiziun indöt 98,4 miliuns de euro, de chisc 82,2 miliuns sciöche cofinanziamënt europeich dal Fonds europeich de svilup regional (FESR) y 16,2 miliuns de cofinanziamënt da pert dl Stat. I partners che pó pert ala bandida de concurs é aministraziuns publiches locales, agenzies y fornidus de sorvisc publics, universités, zëntri d’archirida, d’istruziun y de formaziun, organisaziuns de sostëgn dles impreses, grups d’interes y assoziaziuns desvalies dl setur terziar.
Le pröm „call“ dla perioda 2014-2020 á incö ciafé l’aprovaziun da pert dla Junta provinziala cun tl zënter trëi tematiches: la realisaziun de proiec de archirida y inovaziun, natöra y cultura y competënza istituzionala. I fonds a desposiziun tl contest dl pröm call por la presentaziun dles propostes é de indöt 30 miliuns de euro dai fonds FESR spartis sö insciö: 10,5 miliuns de euro por archirida y inovaziun, 11 miliuns de euro por la promoziun dl patrimone cultural y natural, 8,5 miliuns de euro por istituziuns che ó potenzié l’efiziënta dles aministraziuns publiches. Le sostëgn por un n proiet pó se möie danter i 100mile euro cina a un n miliun de euro.
La bandida gnará daurida ai 14 de merz y publicada sön le sit internet www.interreg.net. L’istituziun de gestiun dl program Interreg é por la Provinzia de Balsan la Repartiziun Europa. Danter i proiec finanziá tratan l’ultima perioda él sté le tru dles rodes Minca-Aunejia, i trasporc transfrontaliers cun le Comelico y le Ciadura y les scomenciadies culturales dl Triangul retich dla Val Venosta.
rc
