Atualità
Dala Junta: contribuc nüs por i pendolars, domandes cina jügn
La Junta provinziala á stabilí incö (ai 08/03) i criters nüs pro la conzesciun di contribuc ai lauranc dependënc por les spëises de iade. I criters, proponüs dal assessur Florian Mussner, ti corespogn ales diretives UE y á le fin da sostigní i pendolars che fej na trata lungia y complicada por arjunje le post de laur. Les domandes pó gní presentades da aurí cina ai 30 de jügn.
La Junta provinziala á mudé la regolamentaziun che stabilësc i contribuc por les spëises de iade a bëgn di lauranc dependënc pendolars y á spezifiché i conzec de residënza abituala y de post de laur, s’adatan ince ala normativa de dërt europeich. „Sön la basa di criters nüs pó i contribuc gní conzedüs ai lauranc dependënc che se sposta por almanco 120 dis al ann por chestiuns de laur dala residënza abituala, tl’Uniun europeica o tla Svizera, cina al post de laur tl Südtirol, o ince tl ater vers por i pendolars che á la residënza tl Südtirol y vá te n ater Stat europeich o tla Svizera a lauré“, spliga Mussner öna dles novités.
Le dërt da presenté domanda á i dependënc y les dependëntes che se tëgn sö de regola tla provinzia de Balsan y mëss arjunje por almanco 120 dis al ann so post de laur tla regiun y fá na trassa de plü co 18 km (te öna na direziun) olache al ne passa degun sorvisc publich de linia por almanco mesora. Le contribut é calcolé ma por le percurs che reverda le teritore dla provinzia. Danter i criters por l’assegnaziun di contribuc él da ciafé la destanza danter post d'abitaziun y staziun d'architada, la combinaziun danter i orars di mesi dl trasport publich y di orars di turnus de laur, sciöche ince i tëmps da aspeté i mesi dl trasport publich.
Al ne vëgn nia conzedü n contribut sce le davagn brutto al ann (düc i davagns zënza detraziun dles spëises che po gní trates jö) fej fora plü co 50.000 euro o sce al vëgn adoré n auto de sorvisc debann. Por la calcolaziun dl contribut vel l'import unitar de 5 cent al chilometer por le iade da jí y gní y da moltipliché por i dis de laur.
Les domandes de contribut che reverda le 2015 pó gní presentades dal 1. de aurí dl 2016 inant cina ai 30 de jügn al Ofize Trasport de porsones. Por i contribuc ai pendolars che reverda le 2014 y che ne é nia ciamó gnüs paiá fora é i criters da denant varënc. Vigni ann, insciö recorda l’assessur Mussner, ejaminëia y manajëia la Provinzia milesc de domandes.
rc
