Atualità
Dala Junta: löm vërda al Consëi dla Claudiana
La Junta provinziala á nominé incö (ai 15 de merz) le Consëi nü dla scora alta de sanité Claudiana y á ince adaté le statut ales mudaziuns iuridiches nöies.
Do la nominaziun dl primar de dermatologia dl ospedal da Balsan Klaus Eisendle sciöche presidënt nü dla Claudiana á la Junta provinziala definí incö i atri rapresentanc dl Consëi d’istitut. Al se trata de Vilma Gozzi (rapresentanta dla Direziun generala dl’Aziënda sanitara), Waltraud Tappeiner (por la Direziun tecnich-assistenziala dl’Aziënda sanitara), Hermann Markus (rapresentant di doturs responsabli di cursc de stüde), Paola Sperindè (rapresentant di responsabli di cursc de stüde) y Klemens Folie (rapresentant di studënc).
Le Consëi dla Claudiana nü á l'inciaria por i proscims trëi agn (nia plü cinch cina denant): chësta é ince öna dles mudaziuns dl statut aproades dala Junta provinziala por s’adaté ala regolamentaziun statala nöia. Le numer é implü gnü amplié a sis comëmbri. „Le Consëi é sëgn indô completamënter operatif y laurará sëgn ince por potenzié la colaboraziun cun le Tirol y cun la tlinica universitara de Desproch“, sotlignëia l’assessuria provinziala por la sanité Martha Stocker.
rc
