Atualità
Dala Junta: sostëgn por la cumpra de 35 corieres nöies
Corieres modernes, comotes y ecosostenibles: le numer di mesi che vëgn adoré por le trasport publich tl Südtirol gnará tosc amplié tres la cumpra de 35 corieres nöies. Na pert dles ressurses nezesciares vëgn metüdes a desposiziun dala Provinzia de Balsan al Consorz LIBUS. L’obietif é chël da adoré tl dagní ma plü corieres cun manco de 12 agn de vita.
„Le contribut dla Provinzia al consorz LIBUS – á splighé le presidënt Arno Kompatscher – é avisa valif ala pordüda de valur di mesi de trasport cina ala tomada dles conzesciuns atuales por le sorvisc publich de linia che é preodüda por le 2018.“ En sostanza sará la pordüda de valur, aladô dles stimes fates, do da trëi agn dl 50 porcënt y chësc porta para n investimënt da pert dla Provinzia de Balsan de 4,6 miliuns de euro por la cumpra de 35 corieres nöies.
Aladô dl’acordanza podará i mesi dl trasport publich ma gní adorá por ghiranzes dades dant dala Provinzia y cun la tomada dles conzesciuns sarál spo la man publica che tolará la dezijiun sön l’adoranza di mesi tl dagní y sön le finanziamënt dl’operaziun. „Le vantaje prinzipal de chësta operaziun é che la Provinzia ará tosc a desposiziun de plü corieres nöies che tëgn cunt dl ambiënt y che é adatades ales esigënzes de porsones cun dificoltés“, spliga l’assessur por la mobilité Florian Mussner.
Cun la tomada dles conzesciuns de linia preodüda por la fin dl 2018 prevëiga la lege provinziala sön la mobilité nöia che le sorvisc vëgnes assegné aladô de na gara publica sciöche ince scrit dant dales normatives europeiches. Le cost che la Provinzia gnará spo calcolé sön la basa de n prisc por chilometer fat, che conscidrëia ince i cosć da sostigní por la cumpra di mesi dl trasport. „Chësta norma sará ince na sauridanza por la Provinzia, deache insciö sarál poscibl pro i conzescionars da finanzié diretamënter la cumpra de corieres nöies zënza contribuc direc dala man publica“; insciö l’assessur Mussner.
rc
