Atualità
Dala Junta: ok al program de IDM, finanziamënt da 30 miliuns
La Junta provinziala á aprové le program de ativités por le 2016 de IDM Südtirol, la sozieté nasciüda dala fujiun de SMG, EOS, TIS y BLS, y che á l’obietif da sostigní la competitivité, l’inovaziun, l’export y da promöie i produc südtirolej. Le budget complessif por le 2016 é de indöt 30 miliuns de euro.
„L’obietif – insciö á splighé le presidënt Kompatscher – é chël da alisiré l’inserimënt di colaboradus tla sozieté nöia IDM do les esperiënzes fates tles aziëndes da denant por passé tosc ala fasa operativa, s’anuzan de döt le potenzial a desposiziun.“ Le travert prinzipal de IDM Südtirol é chël da acompagné le svilup dl teritore dal punt de odüda economich y da ti pité sorvisc ales impreses te n’otica de mioramënt dla competitivité. Da öna na pert vëgnel insciö sostigní aziëndes che laora te Südtirol ti seturs dl’inovaziun, dl export y dla venüda de produc, y dal’atra pert vëgnel favorí l’insediamënt de aziëndes nöies tl Südtirol.
Le program de ativités aprové incö (ai 15 de merz) dala Junta provinziala prevëiga n budget por IDM Südtirol de 30 miliuns de euro. „Por le 2016 él ciamó preodü da lauré sön la continuité di conzec, cun le proscim ann gnarál spo lauré deplü ince sön idees y proiec nüs“, insciö le presidënt Kompatscher che á recordé che cun i 1,7 miliuns de euro che röia lapró dala Ciamena de Comert, di contribuc dal'UE y dala venüda de sorvisc ales aziëndes sará le budget complessif de 42,5 miliuns de euro.
L’ativité de IDM Südtirol é partida sö te trëi arees: la seziun Development (svilup) cun a cé Hubert Hofer che se fistidëia dl sostëgn al’inovaziun, analisa de svilups nüs y de idees por favorí le Südtirol sciöche destinaziun economica y de produziun, la seziun Sales Support cun a cé Bettina Schmid che ti dá n aiüt ales aziëndes che laora ti seturs dla promoziun dles venüdes, cun fieres y tres l’internazionalisaziun y la seziun Communication cun a cé Marco Pappalardo che planifichëia strategies de marketing, de PR y de comunicaziun ti marciá desvalies. Le diretur dl’aziënda speziala é Hansjörg Prast, la IDM é de 60 porcënt de proprieté dla Provinzia y de 40 porcënt dla Ciamena de Comerz.
Por de plü infomraziuns: idm-suedtirol.com
rc
