Atualità
Contribuc por la sconanza dl paesaje, 2015 da record
Tratan le 2015 él gnü despartí fora tl Südtirol indöt 3,8 miliuns de euro por contribuc por intervënc de mantignimënt y de cura dl paesaje rural. Al se trata de na soma en aumënt conscidran l’andamënt di ultims 10 agn y por l’assessur Richard Theiner é chësc n „segnal important por la sconanza dla contrada tradizionala“.
Do l’architada ai contribuc tl 2014 y cun n valur mesan de 1,2 miliuns de euro ti ultims10 agn á l’ann passé podü registré numeri da record: i contribuc por intervënc de mantignimënt y sconanza dl paesaje é stá tl 2015 de indöt 3,8 miliuns de euro. „Chësc é n segnal important da pert dla Junta provinziala dantadöt por ci che reverda la sconanza de nostes tradiziuns da n punt de odüda cultural, turistich y ambiental“, insciö l’assessur por l’ambiënt Richard Theiner.
Na pert di contribuc dl 2015 é gnüs aprová sciöche contribuc por les zones sot a sconanza (1,3 miliuns de euro) y n'atra pert sciöche finanziamënc por la cura dl paesaje te raiuns nia sot a sconanza (2,5 miliuns de euro). Plü avisa él gnü dé fora 960mile euro por 750 domandes por la realisaziun de mürs a sëch, zirca 1 n miliun por tëc cun scianores, 260mile euro por sis de lëgn y 290mile euro por de pici monumënc culturai rurai. Les domandes por l’ann 2016 pó ince bele gní fates.
rc
