Atualità
Frabiché alisiré: n valgönes novités
Aspetan la presentaziun dla lege de reforma nöia dl sistem dl frabiché alisiré dl assessur competënt Christian Tommasini jarál en forza ti proscims dis n valgönes mudaziuns dla normativa atuala y d’atres cun le 1 de jená dl 2017.
„L’obietif dla lege de reforma nöia che reverda l’ordinamënt dl frabiché abitatif alisiré sará chël da stabilí n valgönes mosöres nöies por favorí i zitadins pro la cumpra o la costruziun dles ciases de proprieté, mo ince por stabilisé deplü le marcé di afic“, spliga l’assessur por le frabiché alisiré Christian Tommasini. N valgönes mudaziuns dl ordinamënt aproades ai 4 de merz dal Consëi provinzial jará en forza atira do la publicaziun dla lege nöia, d’atres dal 1 de jená dl 2017 inant.
Danter les desposiziuns che jará en forza atira él la domanda de ressanamënt che podará gní fata ince dan la tomada di 25 agn do l’ultim ressanamënt y, te chël caje, ne vëgnel nia reconesciü i laurs bele fac te chëra perioda. Implü vëgn i aumënc de cubatura de sura le 20 porcënt conscidrá sciöche ressanamënt tl momënt che le proiet prevëighes la realisaziun de n’abitaziun che ne sides nia plü grana de 110 metri cuadrac de spersa dl funz.
Atira en forza jará ince la mudaziun che reverda le conzet de adatamënt dl cuartier por ci che reverda la destanza dal post de laur. Sce an á te süa proprieté n’abitaziun o an ó cumpré n’abitaziun nöia él gnü stabilí che la destanza minima dal post de laur o dla residënza dl’abitaziun dla proprieté mëss ester de 40 chilometri, mo sce l’abitaziun é sura i 1000 metri de altëza spo vél na destanza de 30 chilometri. Chësc prinzip vél sides por la proprieté de chi che fej domanda co ince por i geniturs, joceri y mituns.
La clausola soziala preodüda por les abitaziuns por chëres che an á ciafé alisiraziuns por le frabiché abitatif passa dai 20 ai 10 agn. De conseguënza vëgnel ince smendri le clausola por le grunt alisiré dai 30 agn a 20 agn y insciö él ince poscibl te chësc caje da damané do 10 agn l’anulamënt dla clausola cun le paiamënt dla soma preodüda (10 porcënt dl cost convenzioné de costruziun). Al é implü preodü na norma de transiziun che ti pormët a düc i anuzadus che á bele superé i 10 agn de clausola soziala da damané l’anulamënt dla clausola cun le paiamënt dl 10 porcënt dl’alisiraziun conzedüda ti pröms 5 agn do le pröm dezenn y dl 5 porcënt ti 5 agn che vëgn daldô.
Nia dötes les mudaziuns dl ordinamënt dl frabiché abitatif alisiré aproades dal Consëi provinzial jarál en forza diretamënter, mo n valgönes sará varëntes dal 1 de jená dl 2017 inant. Chëstes mudaziuns reverda les condiziuns de amisciun ales alisiraziuns por le frabiché sciöche por ejëmpl l’eliminaziun dla cuinta fascia de davagn, l’eliminaziun dles desposiziuns speziales por i pers jogn y l’oblianza da avëi n davagn netto complessif nia plü bas dl minimum vital.
Sües domandes podará i zitadins ti ortié tles proscimes edemes ales portines dl Ofize Promoziun dl frabiché alisiré dles sëntes de Balsan, Porsenú, Bornech, Maran y Schlanders. Por de plü informaziuns prëibel tliché chiló.
rc
