Atualità
Nëi sön le Ju de Frara – Assessur Mussner: „Critiches ala misciun falada“
La tröpa nëi che é gnüda jö ai 5 de merz sön le Ju de Frara á porté a n caos sön strada. La Repartiziun Sorvisc Strades dla Provinzia é gnüda criticada de ester la gaujia de chësta situaziun. „Chëstes critiches ne á degöna fondamënta y vá cuntra l’ënt falé“, sotlignëia l’assessur Florian Mussner.
„Sce an vá zoruch ai avenimënc de n sabeda ai 5 de merz él da sotligné che na pert di autisć á porvé da jí sura le Ju de Frara zënza morones y zënza montli da d’invern. Y chësc te na situaziun cun dër tröpa nëi y n vënt dër sterch“, dij l’assessur por la mobilité Florian Mussner. „Jí cun l’auto zënza les precauziuns preodüdes dal Codesc dla Strada ó dí mët en prigo se instësc y i atri, mo á ince porté ala creaziun dl caos sön strada“, insciö Mussner. Deache n valgügn autisć â porvé da sciampé dant ai auti chic ê la strada blocada te trames döes les direziuns.
La critica che le Sorvisc Strades ais fat massa püch conscidrëia Mussner daldöt falada. „Le Sorvisc Strades á ince te chësta situaziun porvé da fá döt le poscibl, bele dales 05.30 él gnü lauré cun cadrëies por tó demez la nëi y ingiaré. Por ne mët nia en prigo les fontanes dl’ega tl Comun de Sëlva ne él nia poscibl da ingiaré sön la pert dal Ju de Frara en direziun Sëlva“, insciö l’assessur Mussner.
Deache la tomada de nëi ê tres plü consistënta ân spo tut la dezijiun, adöm ala comisciun dles lovines, da stlü la strada dales 16.00 inant. Da desparé la strada dala nëi ne ê nia plü poscibl deache les cadrëies ne passâ nia plü amesa i auti fora che ê chic sö por strada. Le Sorvisc Strades â de conseguënza contaté i Carabinieri che â archité düc i auti che gnô adalerch y chi che ne podô nia plü se möi ê gnüs condüt demez dai Stödafüch de Sëlva.
N’atra cossa che é gnüda criticada é sté che i mesi dl trasport dl Sorvisc Strades ne ê nia jüs a intergní sön la pert dla Val Badia dl Ju de Frara. Ince chësta critica ne é nia iüsta deache tl post olache al ê gnü a se le dé l’impifada di autos ne â i mesi dl trasport dl Sorvisc Strades degöna poscibilité da oje. „Al foss sté nezesciar da jí sö inzescü sö por le Ju de Frara, na cossa te chëres situaziuns meteorologiches daltöt nia responsabla y ince prigorosa“, insciö Mussner. Implü ne ti ess la nëi desparada demez a na te manira nia garantí la poscibilité da jí inant ai auti, recorda Mussner.
Le fazit dl assessur Mussner é insciö che „le Sorvisc Strades dla Provinzia, i Carabinieri y i Stödafüch á fat döt le poscibl por ciafé na soluziun ala situaziun che é gnüda a se le dé por gaujia de n comportamënt iresponsabl da pert di autisć“, insciö l’assessur. „A vëi essun messü ti ortié les critiches y nia al Sorvisc Strades.“
USP
