Atualità
Dala Junta: coriera danter Sanciana y Ciadura, le sorvisc vá inant
Al jará inant almanco cina la fin de ma le sorvisc de coliamënt dles corieres danter Sanciana y Santo Stefano di Cadore. La Junta provinziala á aprové inier ai 22 de merz la prorogaziun dla convenziun cun la Provinzia de Belun sön proposta dl assessur por la mobilité Florian Mussner.
Le coliamënt ê gnü planifiché avisa dan da n ann sciöche proiet de proa cun n’acordanza danter les provinzies de Balsan y Belun. Le coliamënt cun les corieres dl sorvisc publich ne ê insciö nia ma ponsé por ti jí adincuntra ales esigëntes di ghesć y dles porsones che vá sö por munt, mo ince por socodí les tröpes domandes da pert dl monn dl laur, en manira particolara da pert di pendolars che laora ti seturs dl comerz y dl turism.
Inier (ai 22 de merz) á la Junta provinziala tut la dezijiun da proroghé cina almanco la fin de ma le sorvisc de coliamënt danter Sanciana y Santo Stefano, che aladô dla convenziun ess messü tomé ala fin de merz. L’assessur Florian Mussner firmará la conveziun nöia por le sorvisc de coliamënt danter les döes localités. Sön döta la trata da 43,2 chilomteri pón viajé cun les chertes, i abonamënc y les condiziuns dl sistem dl trasport publich dla Provinzia de Balsan: chël ó dí che al é poscibl da adoré ince le Südtirol Pass, l’Abo+ y la Mobilcard.
Danter la Val de Puster y la Ciadura él ince planifiché n proiet de realisaziun de na linia de ferata che portass a na revalutaziun dl’area dles Dolomites cun n coliamënt feroviar danter Toblach y Ampëz. Le presidënt Arno Kompatscher y le suranstant dl Venet Luca Zaia á firmé tl mëis de forá dl ann passé le protocol d’acordanza por realisé n stüde de fatibilité.
rc
