Atualità
Museums provinziai: bilanz 2015 y previjiun 2016
Tl 2015 á i nü museums provinziai registré adöm indöt 800.000 vijitadus conferman le gran interes dl publich, dantadöt ince di residënc. Ince por le 2016 él preodü de plü scomenciadies y proiec, danterater la cuinta ediziun dla Trienala Ladina tl Museum Ladin Ciastel de Tor.
Te chëstes edemes deura indô düc i museums provinziai do la stlüta sajonala: dai 15 de merz cina al 1 de auri dauriará indô la maiú pert di nü museums sües strotöres che vëgn gestides dala Provinzia autonoma de Balsan tres l’Aziënda „Museums provinziai“. Tl 2015 él gnü registré indöt 800.000 porsones che á vijité les mostres y les manifestaziuns di Museums provinziai, nia ma tröc ghesć mo ince jënt dl post á anuzé chësta poscibilité ince sce le 2015 é sté n’ann cun tröp bel tëmp y insciö nia ideal por na vijita ai museums.
Un di obietifs plü importanc di museums provinziai é chël da ester bugn da motivé tres de plü porsones dl post da vijité les strotöres museales spartides fora por la Provinzia. N aumënt dl 10 porcënt é gnü registré tl 2014 (en confrunt dl 2013), i dac por le 2015 é ciamó en elaboraziun. N’importanza fondamentala á te chësc vers ince les families y i jogn. „I museums provinziai é istituziuns che trasmët la richëza culturala de nosta Provinzia te plü formes y al é ince posć olache la jënt s’incunta por se baraté fora y fá esperiënzes deboriada“, dij l’assessur por i museums Florian Mussner. L’assessur ti sporj insciö l’invit a dötes les families y ai jogn da jí a vijité i museums y a tó pert ales manifestaziuns culturales.
N ater obietif di museums provinziai é l’ampliamënt dl’archirida. Ince chiló él da segnalé n trend positif cun n aumënt dles publicaziuns scientifiches da pert di colaboradus di museums provinziai che á ince tut pert a proiec d’inrescida finanziá tres i fonds dl’Euregio. Por mantigní y renforzé i standarg de cualité di museums provinziai él gnü metü da jí dal 2010 inant n prozes de brenchmarketing, por svilupé strategies coletives di museums aladô dla valutaziun de dac y indicadus. „Te chësc vers é i museums provinziai ince istituziuns de svilup dl panorama di museums y zëntri de competënza por le laur museal tl Südtirol“, dij Karin Dalla Torre, la direturia dla Repartiziun Museums y dl’Aziënda „Museums provinziai“.
Por ci che reverda les manifestaziuns plü importantes di museums por le 2016 él da segnalé tl contest ladin la Trienala Ladina metüda a jí dal Museum Ladin Ćiastel de Tor. L’esposziun dles operes di sis artisć y artistes sará da odëi da setëmber dl 2016 cina jügn dl 2017. Implü organisëia le Museum Ladin n convëgn sön la funziun di museums por la sconanza y la promoziun dl patrimone cultural dles mendranzes linguistiches tl mëis de jügn. Por ci che reverda le Museum Ladin Ursus ladinicus él preodü de plü scomenciadies tratan l’isté por adulc, families y mituns, vijites acompagandes, escursciuns, workshops, jüc y cursc de ladin.
Por informaziuns sön les scomenciadies di atri museums prëibel s’informé tres la verjiun todëscia o taliana dl comunicat stampa. Plü informaziuns söi Museums provinziai en general pón ciafé tres la plata internet: www.musei-altoadige.it
rc
Galaria dales fotografies
