Atualità
Dala Junta: DURP ajorné por prestaziuns plü mirades
Les mudaziuns de n valgügn criters de valutaziun dl davagn tres la DURP, la „Detlaraziun Unificada de Davagn y Patrimone“ é gnüdes aproades incö (ai 05 de aurí) dala Junta provinziala. Cun i adatamënc gnarál garantí prestaziuns plü mirades y al gnará mioré ciamó deplü le sistem.
La DURP - „Detlaraziun Unificada dl Davagn y Patrimone“ - é la detlaraziun dla situaziun economica che le zitadin mëss presenté por podëi s’anuzé de n valgönes prestaziuns economiches y alisiraziuns dles tarifes. Les mudaziuns aproades incö dala Junta provinziala é gnüdes elaborades da n grup de laur tecnich y valutades positivamënter dal comitê di rapresentanc dles assoziaziuns soziales y economiches, dai sindacac y dal Consorz di Comuns. Les mudaziuns ajornëia insciö la DURP ales esigënzes nöies di zitadins.
La deliberaziun, insciö á recordé le presidënt Kompatscher, müda le regolamënt de relevaziun dl davagn y dl patriome aladô de n valgügn criters nüs: por ejëmpl ne gnará i stipendiums dla Provinzia por studënc dla scora primara o secondara nia plü calcolá tla DURP. Novités él ince por le personal cualifiché che vëgn zoruch dal ester y che pó s’anuzé tla Talia de n bonus fiscal cun la soma de alisiraziun che messará gní conscidrada tla DURP. Imobiliars secuestrá o pignorá ne gnará gnanca plü calcolá tl patriome dla DURP, deache i interessá ne á plü degügn vantaji da chisc imobiliars. Contribuc por retüdes de dagns sará ma plü calcolá parzialmënter tl patrimone finanziar.
„La Junta á ince tut la dezijiun incö da aprové n valgönes mudaziuns che reverda i davagns dal’agricoltöra y dales ativités autonomes“, á recordé l’assessuria Stocker. Sciöche preodü dal regolamënt dla DURP gnará i davagns pausciai tl’agricoltöra ajorná vigni dui agn. Implü él ince gnü alzé chisc imporc pausciai dl 2,1 porcënt sön la basa dl contrat coletif provinzial por i lauranc tl setur dl’agricoltöra.
N ater punt che é gnü mudé é i davagns mesans sön chi che al vëgn calcolé i davagns dal laur autonom, dales impreses singules y dales partezipaziuns te sozietés. Tla calcolaziun dla DURP ne pó chisc davagns nia ester plü basc dl davagn de n laurant cualifiché aladô dl contrat coletif dl setur interessé. Deache i davagns é gnüs alzá dl 10,2 porcënt do l’aprovaziun dla tabela dl 2011 (por gaujia dla situaziun economica negativa ne ési nia gnüs aumentá tl 2013) á la Junta provinziala aprové i adatamënc de coreziun di contribuc che vëgn dales ativités autonomes.
rc
