Atualità
No Credit: Jorantins sëgn ince por Ladin
Les informaziuns prinzipales di jorantins No Credit é da ciafé da sëgn inant ince por Ladin.
La verjiun ladina é gnüda traslatada tl idiom dla Val Badia y sön le flyer él da ciafé les informaziuns plü importantes sön les trasses plü prigoroses por i motoziclisć tl Südtirol y tl Trentin. Por le pröm iade ne él nia da odëi na fotomontaja, mo na testimonial reala cun na storia da cunté fora dla vita. Le placat nü mostra Doris, che á albü cun 17 agn n inzidënt cun le motor pro chël che ara á pordü na iama. „Por le pröm iade él insciö na porsona che mostra na fotografia sensibla che nes visualisëia les conseguënzes tragiches de secunc de dejatenziun cun situaziuns che pó cambié döt le percurs dla vita“, á splighé l’assessur por les strades y la mobilité Florian Mussner.
„La gran orenté da orëi fá para pro la campagna á paié la mëia sce i sun buna da porté pro che d’ atri ne se fejes nia me sön strada“, á dit la jona, che á ciafé tröpes laldes por so coraje y so engajemënt por la segurëza sön strada. Cun süa aziun oress Doris ince se sporje pormez a dötes les ëres jones che ne se fej nia tröc pinsiers da se senté doia söi motors. „I me á imaginé mia vita te n’atra manira, tratan che mi cumpagns ê al mer o sö por munt messâi iö combate y azeté mi corp y tres ciamó é la cura de mia protesa n fistide“, á cunté Doris. L’assessur Mussner á sotligné süa amiraziun por le coraje de Doris che á cunté incö süa storia, por daidé i atri y por la manira sciöche ara vir süa vita cun chësc handicap.
Ince chësc ann é la campagna de No Credit basada sön i trëi pilastri dla sensibilisaziun, di controi y dla costruziun de barieres de proteziun. Porchël organisëia ince chësc ann indô les forzes dl ordin controi de velozité costanc sön dötes les strades dl Südtirol. Por sostigní le laur dla polizia locala á la Provinzia dl Südtirol ince cumpré dui radars nüs. I intervënc de costruziun reverda n ampliamënt dla segnaletica y dla ilominaziun dles strades, le ressanamënt de toc de strada danejá y le montaje di tlandri dles strades te posć dër da prigo. Un di contignüs prinzipai de No Credit é ince la colaboraziun cun le Safety Park a Pfatten, che preivëiga l’organisaziun de cursc y eserzizi de pratica metüs a jí adöm cun i Moho hotí dl post.
Le jorantin por Ladin é gnü injunté.
rc
Galaria dales fotografies
