Atualità
Dala Junta: corieres nöies zënza emisciuns, bandida por i fonds UE
La Provinzia tolará pert a na bandida europeica por le co-finanziamënt de al mascimo 15 corieres nöies zënza emisciuns.
Comodité, efiziënza, prësc degönes emisciuns incuinantes dal punt de odüda dl’atmosfera y dl’acustica. Na gran sbürla al’adoranza di mesi de trasport „vërc“ vëgn dal’Uniun europeica, che prevëiga n sostëgn finanziar consistënt tres n program de cumpra de corieres a idrogen, a chël che ince la Provinzia de Balsan fej para. „Ince por arjunje i obietifs strategics che é inseris tl pachet tlima 2050 él fondamental da lauré inant por smendrí les emisciuns che incuinëia l'ambiënt, cun mosöres che vá a bëgn dla sanité y dla cualité de vita de düc i zitadins südtirolej“, dij l’assessur por la mobilité Florian Mussner.
N vare inant te chësta direziun é gnü fat incö (ai 26 d’aurí) cun l’aprovaziun da pert dla Junta provinziala ala lëtra d’intenüda por la partezipaziun a na bandida europeica che consënt da ciafé n sostëgn da pert dl’Uniun europeica por la cumpra de 10-15 corieres a idrogen nöies cun na soma da inserí tl bilanz provinzial ti proscims agn de 8,5 miliuns de euro. „Implü á la Junta provinziala inciarié la STA, la SASA y l’organisaziun IIT da fá n stüde detaié di cosć-vantaji dles corieres a idrogen en confrunt cun chëres eletriches por capí cares dles döes soluziunes che é la plü buna por les esigënzes locales“, sotlignëia l’assessur Mussner. Le resultat de chësc stüde sará ince la basa por stabilí le sistem de refornimënt plü adaté por i mesi dl trasport local tl dagní.
Aladô dles previjiuns dl program europeich Horizon 2020 él preodü l’inserimënt de 500 mesi de trasport a idrogen te döta l’Europa cun indöt 30 aziëndes y istituziuns che fej para ala scomenciadia. Le Südtirol, da chësc punt d’odüda, á n rode d’ejëmpl cun la presënza de bele cinch corieres a idrogen tl trasport publich local de Balsan cumprades cun n cofinanziamënt europeich tres le program CHIC.
„Por garantí n ampliamënt capilar de düc i mesi de trasport a refornimënt idrogen, ince privac, él nezesciar da aumenté les staziuns de refornimënt. Te chësc contest él bele preodü intervënc a Bornech y Balsan“, spliga l’assessur por la mobilité. Da n’analisa fata da püch él gnü fora che i passajiers y i autisć di mesi a idrogen é dër contënc dl funzionamënt dles corieres.
rc
