Atualità
Jonëza, Ciasa y Laur: la colaboraziun dles trëi Consultes vá inant
Al vëgn lauré ala realisaziun dl pröm proiet de cohousing y coworking a Balsan.Por realisé chësc proiet él bele gnü ejaminé n frabicat de proprieté provinziala.
L’assessur provinzial Christian Tommasini fajará tosc la proposta ala Junta provinziala da destiné le frabicat da denant dla Telefonia statala tl zënter de Balsan (via Corso Italia) sciöche pröm proiet de realisaziun de na strotöra de cohousing y coworking por la jonëza. Le frabicat, che é de proprieté dla Provinzia, mëss denant gní ressané y arjigné ca.
Chësc é ince sté le resultat dla mësa torona di assessurs Florian Mussner y Christian Tommasini cun i rapresentanc dles trëi Consultës di Jogn. Le proscim vare, do l’aprovaziun da pert dla Junta, é chël dl scomenciamënt di laurs a livel tecnich y de contignüs. Sciöche l’assessur Tommasini á splighé messará les trëi Consultes fá propostes sön co arjigné ca le frabicat y ince sön co scrí fora les bandides por fá domanda da podëi abité. Por la pert tecnica gnarál indere a se le dé na colaboraziun danter l’Ofize Manutenziun dla Provinzia adöm cun l’Istitut por le abité sozial IPES. L’assessur ladin Florian Mussner á sotligné che le proiet scomencé é le resultat di inputs dles incuntades bele albüdes dles trëi Consultes di Jogn. Sëgn á insciö ince i jogn la poscibilité da desmostré, en colaboraziun cun les istituziuns competëntes, che le proiet pois funzioné y porté a formes nöies dl abité, insciö Mussner. La realisaziun de chësc proiet podess ince ester spo d’ejëmpl por atri proiec sön döt le raiun provinzial.
Ci ó pa dí cohousing y coworking?
Sciöche al é gnü sotligné tratan la sentada á i jogn aldedaincö de plü dificoltés da scomencé n percurs en autonomia por svilupé inant se instësc y döta la sozieté. Dui di punc fondamentai é la ciasa y le laur, che dötaurela é ince döes dles chestiuns plü critiches por i jogn. Le frabicat che dess gní metü a desposiziun de chësc proiet messass insciö podëi pité plü formes por abité adöm, da afité por jogn single y por families jones che ti consintiss ales families da esters autonomes por ci che reverda l’abité y le laur. Adöm ales sperses por lauré él insciö ince ponsé da realisé arees de coworking cun la poscibilité da smendrí i cosć pro la nasciüda de aziëndes nöies cun l’oportunité da svilupé formes de laur y de colaboraziun nöies. I jogn y les jones che tolará pert a chësc proiet messará ince dediché na pert de so tëmp a chestiuns soziales cun ofertes sides por i abitanc dl frabicat, sciöche ince por döt le cuartier y la popolaziun dla cité.
rc
