Atualità
Streda da Pruca ite dsareda ai 5 y 6 de agost via per l di
OSP – Per lëures de prëscia iel debujën de dsaré la streda (SS 242) da Pruca nchin te Gherdëina. L assessëur per i lëures publics Florian Mussner à dat la despusizion de dsaré chësta streda n merdi ai 5 y mierculdi ai 6 de agost danter la 8 da duman y la 6 da sëira.
La streda da Pruca ite vën dsareda per via de lëures che vën fai pra l tunel nuef de Pruca. La firma PAC ie ntan chisc dis tl lëur de fé n trasferimënt pra la ntreda a nord per avisé demez l’ega dal tunel. Mario Erspamer dl servisc provinziel per la stredes tl raion Salten-Scilier fej al savëi che la streda unirà dsareda riesc do che ie passedes la prima curieres de linea dala 8 da duman y unirà pona inò giaurida ai auti dala 18.00 a na maniera che possa mo passé l’ultima curieres dl di dla SAD. Ntan l di possa i mesuns de trasport astilé ora passan a Tluses, sun la streda SS242 per ruvé te Gherdëina. O scenò passan per la steda provinziela 82 da Pruca nchin a Solaion (dala ustaria Hubertus) y pona tla streda SS242 da Tluses ite. Per ruvé pra la ustaries „Stern“ y „Weißes Rössl“ a S. Piere (Bräuhaus) vëniel cunsià de fé la raida passan per Puntives.OSP
