Atualità
Edema dla familia, 150 manifestaziuns dai 14 ai 22 de ma
Por le pröm iade vëgnel metü a jí tl Südtirol, dai 14 ai 22 de ma, l’edema dla familia: 150 scomenciadies, program presenté dal'assessuria Deeg.
40 organisaziuns, 150 scomenciadies, 30 Comuns, 8 dis: chisc é i numeri dl’ edema dla familia, che vëgn metüda a jí por le pröm iade tl Südtirol dai 14 ai 22 de ma. En ocajiun dl de internazional dla familia, che vëgn festejé sura döt le monn ai 15 de ma, á les assoziaziuns che laora te chësc setur sciöche Elki, Consultore AIED, La Strada, Haus der Familie, Katholischer Familienverband y ciamó d’atres, tut sö l’invit dl'Agenzia por la familia, che coordinëia döt le program presenté incö (ai 9 de ma) dal'assessuria Waltraud Deeg. "L'obietif é condüje tres deplü la familia tl zënter de nosta sozieté sotrissan so rode y süa importanza - á dit Deeg - y sensibilisé l'opiniun publica sön n tema tan zite. Le program é dër rich, y vëiga danfora nia ma momënc d’informaziun y formaziun por gragn y pici, mo ince ativités liades al devertimënt".
L’edema dla familia metará man en sabeda, ai 14 de ma y se stlujará jö en domënia ai 22 de ma. Danter les 150 scomenciadies, feter dötes debann y organisades dai volontars, partides sö te 30 comuns, él jites a tema, conferënzes, letöres de stories y jüc. Tla Haus der Familie de Stella di Renon, por ejëmpl vëgnel metü a jí n fin dl’edema te tenda por peri y mituns, tl Zënter Don Bosco de Laives é döt le de di 22 de ma dediché ales families, le Consultore familiar AIED coiará döm tres mail (info@aiedbz.it) o sön Facebook fotos, dessëgns, stories, poesies y vignetes sön la familia. Rengrazian dötes les organisaziuns y düc i volontars y les volontares che daidará para á l'assessuria Waltraud Deeg dit che chësc apuntamënt se gnará tigní vigni ann. La lista intiera dles manifestaziuns é a desposiziun sön la plata internet dl'Agenzia por la familia www.provincia.bz.it/famiglia.
LPA
