Atualità
Aeroport: lita por corespondënza, domandes cina ai 13 de ma
Cina ai 13 de ma pó düc i südtirolej al’ester fá domanda sce ai ó lité por corespondënza pro la consultaziun popolara sön l’aeroport de Balsan.
La lita de corespondënza pó ince gní anuzada en ocajiun dla consultaziun popolara ai 12 de jügn che reverda le dessëgn de lege „Normes sön l’aeroport“. Düc i residënc foradecá che é scric ite tl register dl AIRE (Register anagrafich di zitadins che á la residënza foradecá) y ince düc chi che vir temporamënter aldinfora dla Provinzia pó fá domanda.
I iscric al AIRE mëss presenté süa domanda cina en vëndres ai 13 de ma tl caje che ai ne oress nia s’anuzé dla lita de corespondënza y gní zoruch a lité ai 12 de jügn tl Südtirol. Ai á ince ciafé n formular (da ciafé online) che ai mëss scrí fora y mené ai Comuns, mo ma sce ai ó gní zoruch por lité diretamënter ti Comuns de residënza. I litadus residënc foradecá che vëgn zoruch a lité tl Südtirol ne á degügn dërc de retüdes o contribuc. Düc i residënc foradecá che ne presentëia degöna domanda por lité tl Südtirol pó dé jö süa usc tres corespondënza.
I südtirolej che vir por n cört tëmp aldinfora dla Provinziua mëss presenté a sü Comuns de residënza – ince chiló cina en vëndres ai 13 de ma – na domanda por podëi lité tres corespondënza, adoran n formular d’icriziun desponibl online cun dötes les indicaziuns nezesciares.
Te trami dui i caji (litadus residënc al ester y litadus che vir aldinfora dla Provinzia por n cört tëmp) sará la domanda ma varënta por la modalité de lita che é gnüda damanada y do la tomada dl termo ne sarál nia plü poscibl da la trá zoruch. Les domandes pó gní presentades personalmënter, tres posta, fax o email y mëss avëi i dac anagrafics y la misciun postala dl porsona che fej domanda sciöche ince la firma. Ales domandes ti mëssel gní injunté n documënt d’identité. Les misciuns di Comuns pon ciafé tlican chiló.
Por plü informaziuns sön les modalités dla consultaziun popolara de ai 12 de jügn prëibel vijité la plata internet http://lites.provinzia.bz.it/rm/index.html
rc
