Atualità
Deeg sön le De dla Familia: „Ressurses investides bun“
„Vigni contribut che vëgn investí tla familia é ince n contribut por le svilup dla sozieté“: chësc dij l’assessuria Deeg en ocajiun dl De dla Familia.
Ofizialmënter é le De internazional dla Familia gnü istituí dal ONU tl ann 1993 y vëgn zelebré vigni ann ai 15 de ma. L’assessuria competënta tl setur dla familia é Waltraud Deeg che anüza l’aniversar por recordé l’importanza dles families por la sozieté: „Propi te na sozieté sciöche la nosta, che á gonot le focus sön l’individualité, mëss le valur dla familia ciafé n rode tres plü zentral, ince deache al é la fontana dla convivënza y dla solidarieté.“ Aladô dl’assessuria Deeg é la familia na tematica che reverda le dagní, sciöche ince desmostré dai dac ASTAT che dij che le dejider da avëi na familia é al pröm post pro les ghiranzes di jogn dl Südtirol.
„La familia – insciö l’assessuria Deeg – é le zënter de formaziun plü important por nosta sozieté y ara é na ressursa fondamentala ince ti momënc de crisa dla vita de vignun de nos.“ Propi por chësta gaujia é la politica damanada da sostigní tres deplü la familia sciöche n pilaster fondamental de nosta comunité. „Vigni contribut dé fora por les families é n investimënt por la chersciüda de nosta sozieté.“ En ocajiun dl De internazional dla Familia vëgnel metü da jí 150 scomenciadies te 30 Comuns da indoman, sabeda ai 14 de ma a en domënia ai 22 de ma. Le program é ince da ciafé sön la plata internet dl’Agenzia por la familia sot ala misciun: www.provincia.bz.it/famiglia.
Manifestaziuns a San Martin
En lönesc, ai 16 de ma, gnarál tigní a San Martin de Badia le referat „Liebevoll erziehen“ (por todësch) dales 20.00 da sëra. Tres a San Martin gnarál tigní en mertesc, ai 17 de ma, dales 20.00 tl Istitut Ladin Micurá de Rü n referat dal titul „Wie kann man Familie und ehrenamtliche Tätigkeit vereinbaren“ (por todësch).
Manifestaziuns a Al Plan
En mertesc, ai 17 de ma, vëgnel ince tigní tla calonia dales 20.00 da sëra n referat dal titul „Wieviel Mutter braucht mein Kind“ (por todësch). En mercui ai 18 de ma gnarál spo a se le dé na sëra d’informaziun dal titul „Mareo – Comume accogliente per le famiglie“ (por todësch) cun Irmgard Pörnbacher tl salf dles manifestaziuns de Al Plan de Mareo. En jöbia, ai 19 de ma, gnarál spo metü da jí te plaza n domisdé por i mituns y les mitans cun la coriera dai jüc dales 14.00 inant. N’incuntada cun barat de informaziuns danter geniturs sará spo sön le program en vëndres, ai 20 de ma, dales 09.00 ales 11.00 tl salf dla Cassa Raiffeisen de Mareo. Spo sabeda, ai 21 de ma, vëgnel organisé na gita por les families a Gut Aiderbichl. La contlujiun dla edema dles families sará spo na santa mëssa por la familia dales 10.00.
rc
