Atualità
Museums tl Südtirol, brosciüra d'informaziun nöia
La brosciüra nöia dada fora dala Repartiziun Museums é dan man cun tröpes informaziuns ütles sön düc i museums tl Südtirol.
Nü é i museums che é de proprieté dla Provinzia y che reverda danter l’ater la cultura ladina, la cultura y storia tiroleja, la storia dl’archeologia südtiroleja, les sciënzes naturales, la storia dles mineores, la ciacia y la pëscia, l’etnografia, la viticoltöra y le turism. Indöt é i nü museums partis sö sön 15 sëntes. Implü röiel lapró 73 museums che vëgn manajá dai Comuns, dales assoziaziuns, aziëndes, fondaziuns o da ënc eclesiastics. A chëstes 82 istituziuns culturales él ciamó da injunté plü de 60 danter coleziuns y lüc d’esposiziun che contribuësc ala richëza museala dl Südtirol.
Sce an cumpëda adöm insciö dötes chëstes istituziuns é le numer complessif de 142 strotöres. Le Comun cun plü museums é le capolüch, Balsan, cun 18 sëntes museales, al secundo post spo Maran cun 8 y al terzo i trëi Comuns de Ahrntal, Porsenú y Aldein cun cater museums porom.
Düc chi che ó ciafé plü informaziuns sön les istituziuns culturales dl Südtirol á la poscibilité da ti dé n’odlada ala brosciüra nöia di Museums tl Südtirol realisada dala Repartiziun Museums dla Provinzia. La brosciüra contëgn dötes les informaziuns sön i orars, i dac de contat y na picera descriziun de vigni museum. Tres le codesc QR él ince poscibl da se colié diretamënter cun le portal internet di museums, www.musei-altoadige.it, che contëgn informaziuns söi prisc y sön les mostres plü atuales. “L’obietif dla brosciüra é chël da avëi dan man les informnaziuns sön le monn di museums te na forma pratica por motivé les porsones da jí a ti ciaré ala richëza di contignüs dl paesaje cultural provinzial“, spliga l’assessur por i museums Florian Mussner.
Por düc chi che vá a ti ciaré a tröc museums te n ann él poscibl da cumpré la MuseumCard (che costa 35 euro por adulc, 25 euro scontada y 70 por les families) che garantësc l’entrada a 90 museums, coleziuns y esposiziuns al’ann. La brosciüra nöia é da ciafé debann pro dötes les assoziaziuns turistiches y da mëz jügn ince tles strotöres museales. Ara pó ince gní apostada pro la Repartiziun Museums, strada Pascoli 2/a a Balsan, e-mail: musei@provincia.bz.it. Implü él ince poscibl da desciarié la brosciüra dal portal di museums.
rc
