Atualità
L trasport per 21.400 sculeies ie segurà
L servisc de trasport per 21.400 sculeies, uni di, ntan l ann de scola 2003/04 ie unì dat pro dal guviern provinziel sun pruposta dl’assessëura Kasslatter Mur. Nce per 600 sculeis y mutons andicapei che muessa ruvé uni di pra scoles, bersots o zëntri de rehabilitazion, à la jonta provinziela dat pro l servisc de trasport.
D’ansciuda puderà 17.300 sculeies furné cun la curieres y la ferata de linea a scola. 4.100 sculeies unirà menei a scola cun auti privac sciche taxis. Nchin a 380 firmes unirà nciariedes per chësc servisc che ie mo unì dat pro dan la paussa da d’instà dl guviern provinziel. I 600 sculeies y mutons andicapei unirà menei cun auti speziei dla comunità de lëur per andicapei, la Pro Juventute y l Scervisc dla „Lebenshilfe“ a scola, tla bersots o ti zëntri per andicapei. Ntan l viac unirà chisc sculeies nce cumpaniei. Sce l ji a scola se l damanda po iel nchinamei puscibl fé cater viages al di. „Nosc fin ie chël che la curieres porte i sculeies bele dal prim di de scola da cësa nchin te scola“ à sorissà l’assessëuera Sabina Kasslatter Mur. Per l servisc de trasport iel unì udù dant ndut 6,964 milions de Euro ora dla casses dla Provinzia. Chësta soma ti mët l ufize per l’assistënza ala scoles a desposizion al ufize per l trasport de persones. Do che l guviërn provinziel a dat pro l servisc de trasport per sculeies muesserà l ufize per l trasport de persones abiné tres l scrì ora di lëures firmes adatedes y mëter ju n cuntrat cun ëiles. La gran cumpëida de servijes da mëter a ji se damanderà na bona uraganisazion da pert dl ufize cumpetënt.OSP
