Atualità
Tröpes scomenciadies por le De internazional di Museums ai 22 de ma
N program rich de scomenciadies por pici y gragn vëgn metü da jí dala Repartiziun Museums por le De internazional di museums en domënia ai 22 de ma.
Indöt 45 museums, galaries y lüc d’esposiziun fej para al De internazional di Museums tl Südtirol cun n program spezial y cun entrades debann a mostres, vijites acompagnades, debatüdes sön l’ert, degustaziuns, rapresentaziuns teatrales, demostraziuns d’artejanat, festes, musiga y tröp de plü.
La scomenciadia é ponsada por pici y gragn cun n’oferta particolara por families. Sön le program él danter l’ater vijites acompagnades speziales, workshops, jüc por mituns y mitans al intern di museums mo ince alaleria. Al se trata de n’ocajiun por descurí i museums cun na prospetiva speziala. Le moto internazional dl’ediziun 2016 é „Museums y paesaji culturai“.
„I museums ne é insciö nia ma istituziuns che comunichëia i resultac dles ativités scientifiches che ai mët da jí, mo al é ince n'ocajiun por colié l’ambiënt cultural y natural cun la sozieté, por amplié la comprenjiun danter porsones desfarëntes y por renofrzé n svilup sostenibl dl ambiënt“, spliga l’assessur por i museums Florian Mussner.
Scomeciadies tles valades ladines
Trëi é les scomenciadies tles valades ladines. Tl Museum Gherdëina tla Ciasa di Ladins a Urtijëi vëgnel organisé n program por pici y gragn dal titul „Stories dut ntëur ai mejes y nosta cuntreda“ cun n pice renfrësch dales 10.30 inant y cun la mostra de modei de lüc da paur da zacan fac da Oswald Mussner de Ziril, dales 11.00 gnarál spo a se le dé n’incuntada cun patruns di lüc da paur che cuntará de sües esperiënzes y recordanzes. Dales 14.00 inant él sön le program de plü scomenciadies por pici y gragn „Da Cebla nchin sa Pedracia, da Dumat nchin ta Linacia“ cun jüc ala scoverta di inoms da zacan cun Pauli Senoner da Santuel. La manifestaziun vëgn organisada adöm al Union di Ladins de Gherdëina. Por plü informaziuns: www.museumgherdeina.it
Le Museum Ladin Ciastel de Tor mët da jí döes scomenciadies. Tla sënta a San Martin él sön le program dales 14.00 ales 18.00 la presentaziun dl proiet „Occhio-Mente-Galileo 2.0“ cun studëntes y studënc di lizeums da Poza de Fascia che cunta de sües esperiënzes scientifiches basades sön les teories de Galileo Galilei. Tl Museum Ladin Ursus ladinicus a San Ciascian sará l’atraziun prinzipala les letöres animades dal titul „SAND_ART“ cun dessëgns de saurun cun musica por pici y gragn. Les letöres gnará tignides dales 10.15, spo domisde dales 14.30, dales 15.45 y dales 16.45. Por plü informaziuns: www.museumladin.it
Al vëgn ince metü da jí n bus navetta danter les döes sëntes da San Ciascian y San Martin da San Ciascian a San Martin dales 13.30 ales 17.30 y da San Martin a San Ciascian dales 14 ales 18 cun na cadënza de vigni ora.
Le De internazional di museums é gnü istituí por le pröm iade dal International Council of Museums (ICOM) cun la partezipaziun atuala de plü co 100 Paisc sura döt le monn. Tl Südtirol é chëra da inann la 12ejima ediziun. L’obietif é chël da fá conësce i museums a n publich ampl y da valorisé le rode di museums tla sozieté. Le program prezis cun dötes les scomenciadies dl De di Museums é da ciafé sot a: www.musei-altoadige.it
rc
