Atualità
L’assessur Mussner sön le De di Museums: „Ai coliëia y arichësc“
Por le De di Museums ai 22/05 á 45 museums tl Südtirol l’entrada debann. „I museums coliëia y archiësc la sozieté“, dij l’assessur Florian Mussner.
Le moto dl De internazional di Museums é inann „Museums y paesaji culturai“. „Tres idees inovatives y cun na gran richëza de contignüs é i museums tl Südtirol n pilaster cultural important por le svilup sozial de nosta comunité“, sotlignëia l’assessur por i museums Florian Mussner en guajiun dl De internazional. „Ai arichësc la porsona singula y döta la sozieté, ai mët le focus sön les tematiches atuales y ai coliëia cultures desfarëntes“, insciö Mussner. Le De internazional di Museums ti fej ince da cornisc inannt ala edema dles families, che se stlüj jö ai 22 de ma, cun ince na seria de scomenciades ponsades propi por les families, insciö Mussner.
Le De internazional di museums é gnü istituí por le pröm iade dal International Council of Museums (ICOM) cun la partezipaziun atuala de plü co 100 Paisc sura döt le monn. Tl Südtirol é chëra da inann la 12ejima ediziun. L’obietif é chël da fá conësce i museums a n publich ampl y da valorisé le rode di museums tla sozieté. Le program prezis cun dötes les scomenciadies dl De di Museums é da ciafé sot a: www.musei-altoadige.it
Scomeciadies tles valades ladines
Trëi é les scomenciadies tles valades ladines. Tl Museum Gherdëina tla Ciasa di Ladins a Urtijëi vëgnel organisé n program por pici y gragn dal titul „Stories dut ntëur ai mejes y nosta cuntreda“ cun n pice renfrësch dales 10.30 inant y cun la mostra de modei de lüc da paur da zacan fac da Oswald Mussner de Ziril, dales 11.00 gnarál spo a se le dé n’incuntada cun patruns di lüc da paur che cuntará de sües esperiënzes y recordanzes. Dales 14.00 inant él sön le program de plü scomenciadies por pici y gragn „Da Cebla nchin sa Pedracia, da Dumat nchin ta Linacia“ cun jüc ala scoverta di inoms da zacan cun Pauli Senoner da Santuel. La manifestaziun vëgn organisada adöm al Union di Ladins de Gherdëina. Por plü informaziuns: www.museumgherdeina.it
Le Museum Ladin Ciastel de Tor mët da jí döes scomenciadies. Tla sënta a San Martin él sön le program dales 14.00 ales 18.00 la presentaziun dl proiet „Occhio-Mente-Galileo 2.0“ cun studëntes y studënc di lizeums da Poza de Fascia che cunta de sües esperiënzes scientifiches basades sön les teories de Galileo Galilei. Tl Museum Ladin Ursus ladinicus a San Ciascian sará l’atraziun prinzipala les letöres animades dal titul „SAND_ART“ cun dessëgns de saurun cun musica por pici y gragn. Les letöres gnará tignides dales 10.15, spo domisde dales 14.30, dales 15.45 y dales 16.45. Por plü informaziuns: www.museumladin.it
Al vëgn ince metü da jí n bus navetta danter les döes sëntes da San Ciascian y San Martin da San Ciascian a San Martin dales 13.30 ales 17.30 y da San Martin a San Ciascian dales 14 ales 18 cun na cadënza de vigni ora.
rc
