Atualità
Van der Bellen é l presidënt austriach nü, i complimënc de Kompatscher
Alexander Van der Bellen é gnü lité sciöche presidënt austriach nü. Le suranstant Kompatscher: „Na porsona cun esperiënza y cun na convinziun europeica.“
Tla litaziun dezisiva danter ma plü dui candidac á le ex-vërt Alexander Van der Bellen batü le candidat dla FPÖ Norbert Hofer y é insciö gnü lité sciöche presidënt nü dla Republica d’Austria. Al é insciö le nono presidënt dl’Austria y tolará le post de Heinz Fischer, che le presidënt dla Provinzia Arno Kompatscher á orü rengrazié por so impëgn: „I á tres albü dër de bun raporc cun Fischer y i oress le rengrazié por döt ci che al á fat por le Südtirol te düc i agn de süa presidënza“, insciö Kompatscher che ti á ince fat les mius aodanzes al presidënt nü Alexander Van der Bellen: „Al é na porsona cun na gran conescënza culturala y cun tröpa esperiënza nia ma tl ciamp politich mo ince sciöche professur d’université. Implü ál na convinziun tl vers dl'Europa importanta.“
Por ci che reverda i raporc danter Viena y Balsan, sotlignëia le presidënt Kompatscher, che le „rode dl’Austria sará inant fondamental por ci che reverda la proteziun y le svilup dl’autonomia südtiroleja. La desmostraziun é ince gnüda a se le dé dan da püch sön na tematica debatüda sciöche chëra dles mosöres straordinares sön le Prener. Le dialogh y la orenté da orëi colaboré, che é ala basa de soluziuns positives y tutes deboriada, ne é mai gnüdes a mancia y i sun sigü che ince tl dagní sarál poscibl da jí inant sön chësta strada“, insciö Kompatscher. Le presidënt dla Provinzia s’aoda da podëi ince jí tosc a Viena por ti fá les aodanzes de porsona al presidënt nü dla Republica austriaca. „Al foss n gran onur ince sce le presidënt Van der Bellen fajess ince tosc na vijita tl Südtirol“, á dit Kompatscher.
rc
