Atualità
I inoms geografics dl Südtirol: Presentaziun dla publicaziun nöia
La publicaziun nöia á plü co 170.000 inoms geografics y de posć, pastöres, sëmenes y tröp d'ater ti trëi lingac provinziai y gnará presentada ai 27/05 a Balsan.
Na racoiüda y cartografia cun na banca dac ampla é le resultat de n laur de relevamënt y d’inrescida de plü agn. Por le pröm iade é chësc bëgn imaterial y cultural gnü racoiü por le pröm iade sistematicamënter aladô de criters scientifics. La publicaziun nöia á le titul „Inoms di posć de Südtirol“ y é gnüda realisada dal Museum Natöra dl Südtirol che fej pert dl’Aziënda Museums provinziai.
Al se trata de n’opera scientifica de referimënt por la trascriziun de inoms geografics storics dl Südtirol. Le proiet d’inrescida é nasciü sciöche colaboraziun danter le Museum Natöra dl Südtirol y l’Archif provinzial. La publicaziun é da ciafé te döes verjiuns todësch/ladin y talian/ladin cun döes CDs ajuntades.
La publicaziun „Inoms di posć de Südtirol“ gnará presentada
en vëndres, ai 27 de ma dl 2016
dales 10.00
tl Museum Natöra dl Südtirol
strada Bottai 1, a Balsan,
dales auturies y dai auturs. Al sará presënc ince le presidënt Arno Kompatscher, l'assessur competënt Florian Mussner, la direturia dla Repartiziun Bëgns culturai y direturia dl Archif provinzial Christine Roilo, la direturia dla Repartiziun Museums y dl’Aziënda „Museums provinziai“ Karin Dalla Torre, la direturia dl Museum dles Sciënzes naturales dl Südtirol Vito Zingerle y les auturies y i auturs Johannes Ortner, Cäcilia Wegschieder y Benno Baumgarten.
Por plü informaziuns: Museum Natöra de Balsan, strada Bottai 1, Balsan, tel. 0471/412964, web www.museumnatöra.it
rc
