Atualità
Dala Junta: sanité, confermé le Stüde de Bornech
Löm vërda da pert dla Junta provinziala ala continuaziun dl Stüde de Bornech por la prevenziun y le tratamënt dles maraties cardiaches y cerebrovascolares.
Le proiet „Stüde de Bornech“ é pié ia tl ann 1990 da n’idea de n grup de doturs y s’á svilupé te na colaboraziun garatada danter i ospedai de Bornech y de Desproch adöm cun l’assoziaziun dla Val de Puster por la prevenziun y le tratamënt de maraties cardiaches y cerebro-vascolares. Al se trata de n’inrescida de dorada lungia sön 1000 zitadins y zitadines danter i 40 y i 80 agn che é gnüs ejaminá te intervai de 5 agn por cöi adöm dac sön la formaziun de patologies sciöche por ejëmpl la arteriosclerosi, maraties vascolares, le bot al cör, dibates, Parkinson, osetoporosi, la migrena y l’ictus. Le proiet á porté a de plü resultac positifs por la popolaziun y söl’educaziun ala sanité y propi sön chësta basa á la Junta provinziala tut la dezijiun incö (ai 31 de ma) da sostigní inant le proiet.
„L’eté mesana dla popolaziun é tres plü alta y le stüde da Bornech é bele da 20 agn n program prezius por l’inrescida, la medejina y l’analisa detaiada dles maraties che vëgn cun l’eté“, á dit l’assessuria por la sanité Martha Stocker che recorda ince che le stüde é na basa importanta por mioré la proietaziun y l’organisaziun dl’assistënza sanitara tl Südtirol.
Cun la deliberaziun aproada incö él la Junta che autorisëia l’Aziënda sanitara provinziala da efetué ejams debann sön les porsones selezionades y da mët a desposiziun i esperc por la realisaziun dl stüde. La sesta ediziun dl „Stüde de Bornech“ vëgn finanziada da n contribut dla Fondaziun por l’inrescida y l’inovaziun y dal’Aziënda sanitara.
rc
