Atualità
Dala Junta: plü lerch por le Parch tecnologich
La Junta provinziala á aproé incö le program planivolumetrich nü dl Parch tecnologich. Al sará plü lerch por istituc d’inrescida y impreses.
I laurs de realisaziun dl Parch tecnologich nü a Süd de Balsan vá inant zënza intardiamënc y dess gní stlüc jö cina l’ann 2017. L’areal sará tl dagní na fujiuna de colaboraziun danter aziëndes y istituc d’archirida che daidará da mioré la competitivité nia ma dles singules aziëndes, mo de döt le teritore südtirolej. La Junta provinziala á dé süa aprovaziun incö (ai 30 de ma) a na variaziun dla proietaziun di interns dl Parch tecnologich NOI por ciafé na soluziun a n valgügn aspec tecnics y de otimisaziun dla funzionalité di frabicac dl’area nöia.
Dötadöm prevëiga l’ajornamënt dl program planivolumetrich variaziuns por 11,8 miliuns de euro. De chisc é 3,5 miliuns de euro investimënc ajuntifs sön spëises bele programades. Al se trata en particolar dla restrotoraziun statica dla pert cun i spidli bele esistënta, de integraziuns pro la garage y dla resoluziun de problems de statica.
Implü röiel ciamó lapró operes nia preodüdes, che ti pitará plü sorvisc y funzionalité al Parch. Por chësc ampliamënt él preodü n investimënt de 4,8 miliuns de euro, de chisc 2,1 miliuns por adatamënc y aredamënc tecnics por laboratori di ënc de archirida, por i adatamënc ai implanc dl telescialdamënt y por la cumpra y istalaziun di implanc de ilominaziun cun energia LED. Adöm cun d’atres spëises sará l’investimënt complessif de 96 miliuns de euro.
Tl’area nöia ará süa lerch i istituc d’archirida LUB, EURAC, Fraunhofer y Agenzia CiasaClima, sciöche ince dl IDM, dla Zënter de sperimentaziun dla Laimburg y dla Eco Research. Implü él ince planifiché na spersa por aziëndes „start-up“ y impreses tecnologiches bele presëntes te Südtirol. Al é ince preodü la costruziun de 21 laboratori de archirida tl seturs dles tecnologies green, alpines y alimentares che podará gní anuzá dai ënc y dales impreses.
USP
