Atualità
Campagna online cuntra la violënza söles ëres
La Comisciun provinziala por l’avalianza dles oportunités y l’assessuria Stocker mët da jí na campagna online cuntra al violënza sön les ëres.
Les leges da sores ne basta nia por eliminé le fenomen dla violënza sön les ëres che pé cinamai da ester tres plü grana , sciöche al nes vëgn raporté ince dales noeles de cronaca cun sis ëres che é mortes por gaujia de violënza dal 29 de ma inant ma sön le teritore dla Talia.
„Do le caje dramatich de Sara di Pietrantonio él incö gnü raporté de ciamó dui caji teribli de ëres copades dai ëi. Tla Talia él bele gnü copé indöt 50 ëres inann por gaujia de violënza de sü oms, chestians o compagns. I messun reagí a chësta ona de violënza“, dij la presidënta dla Comisciun provinziala por l’avalianza dles oportunités Ulrike Oberhammer.
„I caji atuai nes mostra che al é ciamó dër tröp da fá. I messun adoré düc i mesi a desposiziun por daidé les ëres vitimes de violënza y por sensibilisé la sozieté cuntra l’adoranza de vigni forma de violënza“, dij l’assessuria por l’avalianza dles oportunités Martha Stocker.
Por chësta gaujia á la Comisciun y l’assessuria Martha Stocker tut la dezijiun da mët da jí na campagna online #GegenGewalt cuntra la violënza söles ëres, tres chëra che dötes les ëres y i ëi é damaná da tó posiziun cuntra la violënza. La campagna vëgn ince sostignida dal presidënt dla Provinzia Arno Kompatscher y da de plü aconsiadus y aconsiadësses provinziales. Por plü informaziuns: https://www.facebook.com/groups/284835768522010/
rc
