Atualità
Referendum: "Resultat tler che gnará apliché"
Le presidënt Kompatscher: „Dezijiun dërta da fá le referendum – l’orenté popolara é sëgn tlera y gnará realisada“.
Le presidënt dla Provinzia Arno Kompatscher s’á dit contënt de avëi damané do l’arat dla popolaziun por ci che reverda la chestiun dl finanziamënt publich al aeroport da Balsan, ince sce la litaziun finala á mostré che le 70 porcënt di litadus é cuntra n ampliamënt y n finanziamënt publich dla plaza di fligri. „Por gaujia di limic scric dant cina sëgn ne él nia sté meso da fá funzioné l’aeroport te na manira efiziënta. Porchël él ma döes poscibilités sön mësa: n conzet nü por la gestiun publica dl aeroport che reverda ince n’ampliamënt dl’infrastrotöra o l’arbandon da pert dla man publica. Dötes les atres dezijiuns foss stades n'adoranza falada de mesi de finanziamënt publics“, á dit le presidënt dla Provinzia Arno Kompatscher incö tratan la conferënza stampa ai 13 de jügn.
„Les zitadines y i zitadins dl Südtirol á tut la deziijun, che la Provinzia ne dess nia plü finanzié cun ressurses publiches le aeroport da Balsan. Nia ma la porzentuala alta dl No cun 70 porcënt di litadus, mo ince le gran numer de litadus cun 46,7 porcënt che á tut pert ala consultaziun, dá dant na direziun tlera che i respetun y aplicun“, á splighé le presidënt Kompatscher. La pröma conseguënza istituzionala dl No é che le dessëgn de lege ne gnará nia traté dal Consëi provinzial y che la pista d’ateraje ne gnará nia arlunjada, „nia di 138 metri bele arová, y gnanca di 30 metri preodüs dal ddl“, insciö Kompatscher.
Le Consëi d’aministraziun dla sozieté de gestiun ABD (Airport Balsan Dolomites) s’incuntará proscima edema por stabilí i proscims vari, ince deache l’ABD é sëgn oblié da scrí fora n concurs publich por la gestiun dl aeroport. „Cina dailó messará l’ABD ince se cruzié dla gestiun atuala, chësc é insciö preodü dala lege“, insciö Kompatscher. „Sce al ne dess por dui iadi gní ciafé degun conzescionar por l’ABD, spo jará la conzesciun dl aeroport de Balsan zoruch ala ENAC, che pó de süa pert ince scrí fora indô la gestiun“, prezisëia Kompatscher.
L’assessur por la mobilité Florian Mussner á sotligné che „l’aeroport é ma na picera pert dl conzet de mobilité dla Provinzia y che sëgn nen jarará da sostigní deplü i mesi de trasport dl bus y dla ferata“. L’assessur por l’ambiënt Richard Theiner á dit che so departimënt y l’Agenzia por l’ambiënt fajará n monitoraje costant dl incuinamënt acustich y ambiental dl aeroport, belanfat chi che sará le gestur. „L’analisa de impat ambiental dl conzet preodü dal ddl ne gnará nia plü fata, deache le resultat dla consultaziun popolara é cuntra süa realisaziun“, á dit Theiner.
Por le presidënt dla Provinzia é ince la dezijiun da fá n referendum söl tema dërta. „Iö instëss á fat promoziun por le Sce, deache i ê sigü dl bun funzionamënt dl conzet dl aeroport. Sëgn nen jarará da adaté nosc plann dla mobilité publica ince por garantí inant na buna azessibilité por le Südtirol zënza aeroport“, insciö Kompatscher. „Le referendum söla plaza di fligri da Balsan ê un n punt de nosc program de coaliziun. La dezijiun tlera y la buna porzentuala de litadus dá dant na direziun tlera. Da realisé chësta dezijiun sará sëgn nosta inciaria che i aplicarun: zënza sce y zënza ma.“
La lita ti Comuns ladins
Ti Comuns ladins (Badia, Corvara, La Val, Mareo, San Martin, Santa Crestina, Sëlva, Urtijëi) á le no arjunt na porzentuala de 57,1 porcënt y le sce de 42,9 porcënt.
La porzentuala plü alta por le No é gnüda arjunta tl Comun de Urtijëi cun 68, 7 porcënt decuntra (31,3 % a lité Sce), spo Mareo cun 59,5 porcënt di litadus che á lité No (40,5 porcënt a lité Sce), a Santa Crestina 57, 3 porcënt (42,7 porcënt á lité chiló por le Sce), spo á lité 56,9 porcënt di litadus a San Martin de Tor de No al conzet dl aeroport (43,1 porcënt ti á dé süa usc al Sce). Le No á ince davagné a Badia cun le 54,2 porcënt (45,8 porcënt á lité Sce) y a La Val cun le 53,6 porcënt (chiló a le 46,4 porcënt di litadus dit de sce). Na maiú pert por le Sce é gnüda a se le dé ti Comuns de Corvara cun 58,8 porcënt por le Sce ( y 41,2 porcënt por le No) y a Sëlva cun 52,6 porcënt por le Sce (cun 47,4 porcënt di litadus che á lité No).
Imajes
https://we.tl/8sDypPgx7W
Intv Arno Kompatscher de
https://we.tl/BVaNxbwiWr
Intv Florian Mussner de
https://we.tl/PLrYNhSOUN
Intv Richard Theiner de
https://we.tl/6tDiTynmnz
Intervistes Kompatscher - Mussner - Theiner
https://we.tl/nC6m88cCcQ
rc
Galaria dales fotografies
