Atualità
Dala Junta: 20 miliuns por les arees dl program de svilup rural
La Junta provinziala á aproé incö le plann finanziar dles zones tlamades Leader tl contest dl Program de Svilup rural 2014-2020 dla Provinzia.
I sis raiuns Leader che podará s’anuzé dles prozedöres de sostëgn preodüdes dal’UE é la Val Venosta, les zones de confin, les Alpes dl Sarenthein, les Dolomites tla Val d’Isarch, l’Alta Val d’Isarch y la Val de Puster. Al gnará finanzié proiec y mosöres che reverda le program de svilup rural 2014-2020 por n investimënt complessif de 20 miliuns de euro, 4 implü co tla perioda da denant. Denant co aproé i planns de svilup local de vigni raiun él nezesciar che la Junta provinziala dais so arat positif a vigni plann finanziar de vigni singula area. La löm vërda é gnüda incö da pert dla Junta provinziala sön proposta dl assessur competënt Arnold Schuler.
Vigni raiun podará insciö s’anuzé de n finanziamënt de 3 miliuns de euro, i dui miliuns che resta gnará partis sö aladô de dui criters: la valutaziun tecnica di planns de svilup locai y chëra dles sperses interessades. “I proiec y les mosöres é gnüdes definides adöm ai grups de laur de vigni raiun Leader y ales istituziuns, assoziaziuns y aziëndes interessades: les propostes prevëiga ince la colaboraziun dla popolaziun locala”, á prezisé Schuler. Cina la fin de messé gnarál spo analisé y aprové dala Junta vigni singul plann de svilup.
Le program Leader é n’abrevaziun dla descriziun franzeja "Liaison entre actions de développement de l'économie rurale" (che pó gní traslaté sciöche rëi de aziuns por le svilup rural) é gnü a se le dé tl ann 1991 dala UE y le Südtirol fej pert de chësta rëi de promoziun di raiuns rurai bele dal scomenciamënt. Ti ultims 22 agn él insciö sté meso da investí ti raiuns dl Südtirol indöt 50 miliuns de euro a sostëgn dl svilup dles arees rurales plü debles.
rc
