Atualità
Dala Junta: presentaziun dl bilanz do mesa la legislatöra
Fá n pröm bilanz dla legislatöra y presenté i proiec di proscims dui agn y mez sará le fin dles conferënzes stampa di mëmbri dla Junta tles proscimes edemes.
Dai 16 de jená dl 2014 é la Junta provinziala cun a cé Arno Kompatscher ofizialmënter en forza y sëgn él passé mez dl tëmp dla legislatöra di cin’ agn. Por fá n bilanz dl „pröm tëmp“ dla legislatöra á la Junta provinziala stabilí da organisé na seria de conferënzes stampa cun le titul #prömtëmp. Indöt gnarál insciö a se le dé 8 apuntamënc cun le pröm ai 20 de jügn y cina ai 7 de lugio. „Al ne se trata nia ma da presenté dötes les cosses che é gnüdes fates ti ultims dui agn y mez, mo ince da mostré i proiec che é en planificaziun por le 2018“, á splighé le presidënt dla Provinzia Arno Kompatscher.
La pröma conferënza stampa gnará tignida ai 20 de jügn dal assessur Arnold Schuler, spo sarál la ota dl’assessuria Waltraud Deeg (22 de jügn), dl assessur Philipp Achammer (23 de jügn) y dl’assessuria Martha Stocker (24 de jügn). Ai 27 de jügn presentará spo l’assessur ladin Florian Mussner so bilanz, spo él sön le program apuntamënc cun i dui vizepresidënc Richard Theiner (ai 4 de messé) y Christian Tommasini (ai 6 de messé). Ai 7 de messé sarál spo le presidënt dla Provinzia Arno Kompatscher che presentará so bilanz di pröms dui agn y mez a cé dla Junta provinziala dl Südtirol.
rc
