Atualità
Dala Junta: Natöra 2000, 8 miliuns por la valorisaziun
Al é gnü stlüt jö le percurs preodü dal’UE por la converjiun de 35 raiuns südtirolej de Natöra 2000 cun investimënc por 8 miliuns por la perioda 2014-2020.
Aladô dles diretives europeiches sön la flora y la fauna che reverda la sconanza dles sorts de plantes y dles lercs de vita de importanza comunitara é i Stac mëmbri damaná da definí i raiuns de sconanza Natöra 2000 (raiuns de importanza comunitara SIC) y dai trasformé daldô te Zones speziales de conservaziun (ZSC). Por ci che reverda le Südtirol se tratel de 40 zones por na spersa complessiva de 150mile hectars, che fej fora zirca le 20 porcënt dla spersa complessiva dl teritore. Deache la Talia ne á nia tigní ite i tëmps por ci che reverda le percurs de definiziun di raiuns Natöra 2000 á la UE stabilí na prozedöra de violaziun ti confrunc dl Stat. „Por chësta gaujia á Roma scrit dant ales Regiuns y Provinzies autonomes da stlü jö cina la fin de jügn 2016 le percurs de converjiun di raiuns de Natöra 2000“, á sotligné l’assessur por l’ambiënt Richard Theiner.
Incö (ai 14 de jügn) á la Junta provinziala porté a piz chësta prozedöra sön indöt 35 raiuns Natöra 2000, por i 5 raiuns che mancia y che reverda zones dl Parch nazional dl Stelvio gnarál completé le prozedöra cina la fin dl 2016. „La deliberaziun pó insciö gní menada a Roma dan la tomada dl termo por l’aprovaziun da pert dl Minister dl ambiënt. Insciö ne sarál nia ma poscibl da tigní ite i tëmps scric dant dal’UE mo ince da mët man cun les mosöres de valorisaziun y de conservaziun di raiuns da sconé“, á splighé l'assessur Theiner. Indöt vëgnel investí por la perioda 2014-2020 na soma de 8 miliuns de euro, che fej fora n investimënt anual de 1,3 miliuns de euro che gnará manajé adöm ai proprietars, recorda Theiner.
Dötadöm é les desposiziuns finanziares bele contignüdes ti planns de gestiun por i parcs naturai y i biotops che é gnüs svilupá döm ai Comuns y ai grups d’interes. Na pert dles osservaziuns y propostes di Comuns y dles assoziaziuns interessades é gnüdes aprovades dala Comisciun provinziala Natöra, paesaje y svilup dl teritore y insciö inserides ti planns de gestiun. Incö él gnü stlüt jö chësta prozedöra cun l’aproaziun da pert dla Junta.
rc
