Atualità
#prömtëmp, Schuler: Comuns, agricoltöra, proteziun zivila
Competënzes ai Comuns, reforma dla Proteziun zivila, l’agricoltöra y le numer de emergënza unich é stá i temesc prinzipai dla conferënza dl assessur Schuler.
L’assessur provinzial Arnold Schuler, competënt por l’agricoltöra, i bosć, la proteziun zivila y i ënc locai, á chirí fora i Urc de Trauttmansdorff a Maran por fá le bilanz de ci che al é gnü fat cina sëgn te „so“ setur do mesa la legislatöra y cares che sará les priorités por la secunda pert te chësc setur de importanza strategica por le Südtirol.
Reformes dla Proteziun Zivila y dla Laimburg
Schuler á presenté tratan la conferënza stampa sciöche pröm obietif bele realisé l’istituziun dl’Agenzia por la Proteziun zivila nöia, te chëra che al é gnü acorpé trëi seturs: la Repartiziun Operes idrauliches, la Repartiziun Proteziun zivila y i Stodafüch profescionisć. „Cun chësta uniun él sté meso da cherié na strotöra plü asvelta y efiziënta che é buna da tó dezijiuns dër debota y chësc é fondamental. L’Agenzia nöia á indöt 500 colaboradus, n budget anual de 65 miliuns de euro y cumpëda incër 15mile volontars che ne reverda nia ma i stödafüch, mo ince le socurs alpin y chël sot ega“, á recordé l’assessur provinzial. Schuler á spo anunzié che cun le scomenciamënt dl 2017 gnarál a se le dé la creaziun dla strotöra nöia ince por le Zënter de sperimentaziun dla Laimburg, mo ince dl’Agenzia Bosć y demane che se fistidëia dla gestiun de na spersa de zirca 75.000 hectars, de na scora forestala y de na siëia. „Cun le scomenciamënt dl 2017 sarál ma plü öna n’aministraziun unica che ará en gestiun dötes les zones agroforestales dla Provinzia“, á dit Schuler.
Finanziamënc ai Comuns, plann por les munts
Un di punc prinzipai é sté dal 2016 inant l’aboliziun dl fonds de rotaziun por i Comuns cun i investimënc di Comuns che vëgn sëgn finanziá tres contribuc zënza retüdes che gnará ince demanco por merit dles cuotes de retüda. Implü ará les aministraziuns provinziales azes a na cuota fissa de cinch agn sot forma de fonds d’investimënt che podará gní manajada te na manira autonoma. Cina sëgn él ince sté meso da paié fora avisa le 50 porcënt di 183 miliuns de euro de contribuc (74 miliuns por l’agricoltöra y 109 miliuns por l’economia da munt) che aspeta da gní paiá fora dal metëman dla legislatöra. Chësc resultat é sté poscibl da arjunje ince cun na revijiun dl sistem di contribuc.Implü él gnü metü a desposiziun ressurses ajuntives te chësc setur dal bilanz provinzial por 48 miliuns de euro. „N ater punt zentral é le plann de svilup rural cun chël che al é sté meso da mët a desposiziun por le Südtirol 36 miliuns de euro aladô dl program de finanziamënt UE 2014-2020“, á recordé Schuler. Tl dagní dessel ince gní sostigní tres deplü la produziun dl lat tres n’analisa dl sistem agricol local y la lauraziun söl post dl lignan che vëgn autalmënter esporté por le 30 porcënt.
Competënzes ai Comuns, normes de atuaziun sön la ciacia, Numer de emergënza unich 112
Na lege por les reformes istituzionales é bele gnüda arjiganda ca y gnará sëgn debatüda adöm ai Comuns cun l’obietif da trasferí na seria de competënzes ales aministraziuns locales. N’atra priorité é les normes de atuaziun por la ciacia, cun la Provinzia che á recuperé ti ultims agn n valgönes competënzes te chësc setur. „Por ciafé plü segurëza iuridica tl ciamp dla ciacia él gnü elaboré döes normes d’atuaziun nöies che ti gnará sëgn menades inant al Consëi di Ministri por süa ejaminaziun“, insciö Schuler. N ater punt sön le program é le numer d’emergënza unich 112 scrit dant dal’UE che gnará a se le dé en acordanza cun la Provinzia de Trënt.
Bele dal scomenciamënt dla legislatöra é un di obietifs detlará le potenziamënt dl’archirida tl setur dl’agricoltöra, ince deache la sperimentaziun y l’inrescida contribuësc te na manira importanta al svilup dl’agricoltöra locala. „Tres na colaboraziun strënta danter l’Université Lëdia de Balsan y le Zënter de sperimentaziun dla Laimburg, l’ampliamënt dla rëi internazionala y la metüda a desposiziun de plü ressurses finanziares ti dará la Provinzia na sbürla importanta al’archirida tl setur dl’agricoltöra“, á recordé Schuler. Tl dagní gnarál inrescí dantadöt l’inculté cun boacia y l’adoranza de boacia tl’agricoltöra.
Por plü informaziuns:
intervista Arnold Schuler - https://we.tl/CNqAnQWyoo
video #prömtëmp Schuler - https://we.tl/kJ5cLR7qTq
file audio MP3 Schuler - https://we.tl/4KrDCxYAyi
rc
