Atualità
Dala Junta: Plann sanitar provinzial, start al iter d’aprovaziun
La Junta provinziala á aprové incö la prozedöra de aprovaziun dl Plann sanitar provinzial por la perioda 2016 – 2020, che se stlüj jö te novëmber.
Cun le Plann sanitar provinzial nü vëgnel elaboré n stromënt strategich important por reorganisé l’assistënza sanitara tl Südtirol. Le plann 2016-2020 sará na diretiva strategica por le coordinamënt y la reorganisaziun di sorvisc y dles prestaziuns de proteziun, de promoziun y de recuperada dla sanité di zitadins. I colaboraus dl setur sanitar, les rapresentanzes de sindacac y dles assoziaziuns, mo ince les organisaziuns di paziënc á presenté söporjö 300 propostes al grup de esperc formé da Wolfgang Bayer, Michaela Moritz y Francesco Longo. I trëi esperc á spo elaboré le Plann sanitar pian ia dala basa stabilida tl 1999 cun na definiziun nöia di intervënc te na seria de seturs che reverda danter l’ater la reorganisaziun tlinica, l’assistënza söl teritore, la prevenziun y la reabilitaziun. Incö á la Junta provinziala aprové le proiet dl Plann sanitar y i proscims vari che è preodüs por süa aprovaziun. “Le plann é n stormënt che da öna na pert nes consënt da garantí segurëza tla planificaziun de dorada lungia, dal’atra pert vëgnel ince garantí insciö la flessibilité nezesciara por l’atuaziun de mosöres de adatamënt de n secundo momënt”, sotlignëia l’assessuria provinziala Martha Stocker.
30 dis por osservaziuns y propostes
Do la delibera da incö gnará le plann publiché online por ti consintí a düc i interessá da le studié. Implü sarál de plü copies dl plann ince da ciafé tles sëntes dla Repartiziun Sanité, dl Consëi di Comuns y tles ciases di 116 Comuns südtirolej. Al é ince preodü de plü aldiziuns. I ënc, les assoziaziuns y i zitadins á la poscibilité da presenté ti proscims trënta dis sües osservaziuns. “Al é important che la popolaziun dais so contribut cun propostes de mudaziun y integraziun”, spliga Stocker. L’aprovaziun definitiva dl plann sanitar provinzial é preodüda por otober o novëmber.
I obietifs y i seturs d’intervënt
L’obietif prinzipal dl plann sanitar provinzial é chël da planifiché le setur dla sanité te na manira strategica y da garantí l’organisaziun sciöche premissa por na cualité dl’assistënza futura tl dagní che sides basada sön les esigënzes primares di zitadins, interdisciplinara, daimpró ai paisc, ales abitaziuns y efiziënta. L’atenziun di esperc reverda trëi seturs: l’assistënza sanitara de basa, l’assistënza söl teritore y chëra a ciasa y la rëi di ospedai dl Südtirol. Priorités dl plann sanitar é danterater la colaboraziun danter i sorvisc sanitars y chi soziai, na cura mirada dles porsones cun handicaps y di seniors, le mioramënt dl’assistënza por i amará cronics, l’adoranza de sistems IT y na miú colaboraziun danter i doturs de medejina generala, i spezialisć y atres profesciuns sanitares.
La cura dla rëi di ospedai dla Provinzia gnará ince otimisada tres l’armonisaziun dl’oferta dles prestaziuns sanitares pitades dai ospedai de basa (Schlanders, Sterzing; Sanciana) y dai ospedai aziendai (Maran, Porsenú, Bornech) aladô dl prinzip “un n ospedal, döes sëntes”. Les repartiziuns gnará manajades da öna na direziun unica cun n responsabl por les döes strotöres. La reduziun di lec por emergënzes gnará compesada cun l’ospedal da Balsan. Al gnará ince adaté la planificaziun dles ciases de palsa y dles strotöres por seniors ales prospetives y domandes preodüdes por le 2030. Atri punc fondamentai dl Plann sanitar provinzial é la reorganisaziun dl socurs d’emergënza (cun le numer unich 112), le potenziamënt di sorvisc de reabilitaziun a ciasa, la creaziun de n’oferta de assistënza unitara a livel provinzial por les mames y i viadus ince tratan la gravidanza y do la nasciüda.
Le plann sanitar provinzial 2016-2020 definësc ince l’aprovaziun dles strotöres privates sön la basa dles esigënzes locales, la cumpra de atrezadöres por i ospedai ince por ci che reverda i cosć dles atrezadöres y süa utilité. Implü él ince laite n plann dl svilup dl personal, l’atuaziun di programs IT y di sorvisc online (prenotaziuns, paiamënt dles cures, analises digitales) cun mudaziuns al Plann sanitar che pó gní a se le dé tresfora, deache le documënt programatich é na sort de “work in progress” costant.
rc
