Atualità
Dala Junta: Ok ala secunda pert di finanziamënc por 9 films y fictions
Incö á la Junta provinziala deliberé l’aprovaziun dl finanziamënt de 9 produziuns televisves por 142 dis de laur tl Südtirol. Le davagn preodü é de 4 miliuns.
La Junta provinziala á aprové incö la secunda pert di finanziamënc 2016 por le sostëgn di films y documentars che vëgn realisá tl Südtirol. I esperc y la IDM Südtirol, l’Aziënda speziala por l’economia, á stabilí da sostigní indöt 9 proiec tres le Fonds südtirolej por le produziuns.
La condiziun por ciafé n finanziamënt publich é chëra che les produziuns televisives y cinematografiches reinvestësces tl Südtirol almanco le 150 porcënt de chël che ai á ciafé. Por le secundo call él gnü presenté 26 proiec. La Junta provinziala á aprové, sön la basa de na valutaziun dla comisciun d’esperc y dla IDM, da finanzié 9 produziuns cun zirca 1,8 miliuns de euro indöt. La retüda economica söl teritore di 9 proiec, á recordé le presidënt Kompatscher, é stimada sön n davagn de 4 miliuns de euro.
Les produziuns reverda sis films, dui documentars y na seria tv. Al é preodü indöt 142 dis de produziun y de laur cun i aturs, esperc y fornidus de sorvisc südtirolej. „Al se trata de na fujina locala che tol ite indöt cincanta categories profescionales y che reverda sides i artejans co ince les impreses locales“, á ajunté Kompatscher. Döes dles produziuns finanziades é südtirolejes, döes dal rest dla Talia, cater vëgn indere dala Germania y dal’Austria. Danter l’ater vëgnel ince sostigní n documentar söl alpinism cun le regista Reinhold Messer y le film da rí de „Mister Felicitá“ de Alessandro Siani. Aladô dles diretives dla Junta mëss les produziuns garantí la reconësciment dl Südtirol sciöche location, fá referimënt al Südtirol o promöie artisć o ciases de produziun locales.
rc
