Atualità
Dala Junta: dac, analises y proscims vari di reparc de nasciüda
Tl percurs tl vers dl Plann sanitar 2020 á la Junta provinziala ejaminé i reparc de nasciüda ti ospedai, cun n mëis de tëmp da ti respogn al Minister.
Do avëi definí tles edemes da denant i profii dles prestaziuns de basa di set ospedai südtirolej y avëi metü man la prozedöra d’aprovaziun dl Plann sanitar 2016-2020 á la Junta provinziala afronté incö la tematica dl dagní di reparc de nasciüda di ospedai da Balsan, Maran, Porsenú, Bornech, Schlanders y Sterzing. N aprofondimënt che é sté nezesciar ince por i standarg de cualité y de segurëza y por les diretives nöies dl’UE söl orare de laur che prevëiga n aumënt dl personal sanitar.
„La Provinzia á tëmp cina ai 29 de messé por ti presenté al Minister a Roma n plann sostenibl, sön la basa di standarg statai scric dant, por le mantignimënt di reparc de nasciüda söl teritore“, á recordé l’assessuria Martha Stocker do la sentada dla Junta. Insciö á la Junta fat n’analisa complessiva dla situaziun y analisé avisa i dac ajorná di reparc de vigni ospedal. (documënt injunté).
Atualmënter él ma i reparc de nasciüda de Balsan y Maran che corespogn deplëgn ales diretives, „mo i ún inrescí sciöche i podun ince arjunje i standarg de cualité y de sostenibilité por i atri ospedai“, á ajunté Stocker. Cualité y segurëza che reverda dantadöt les umes y i viadus, mo carateristiches importantes por le mantignimënt di reparc de nasciüda é ince la destanza geografica y la presënza de personal spezialisé söl post. Propi por ci che reverda le personal, da öna na pert s’ál desmostré ri da ciafé le personal y dal’atra pert ne vëgnel nia ademplí i critérs de segurëza y de cualité da lauré sistematicamënter te na dorada lungia cun doturs cun contrat de laur atipich y a tëmp determiné.
L’aprofondimënt dla situaziun atuala por ci che reverda le confrunt dl numer dles nasciüdes ti ospedai é de 357 nasciüdes por Schlanders, 460 por Sterzing (de chësctes 220 de porsones aldinfora dl raiun sanitar), i dui reparc de nasciüda romagn insciö sot le numer plü bas scrit dant de 500 nasciüdes. Por ci che reverda les destanzes al proscim ospdeal en referimënt al raiun d’utënza él gnü calcolé 83 chilometri danter Schlanders y Maran y 46 danter l’Alta Val d’Isarch y Porsenú. „Tla chestiun di reparc de nasciüda ne él incö ciamó gnü tut degöna dezijiun, mo sön la basa dl’analisa di dac él gnü fat na gradatöra“, á splighé le presidënt Kompatscher. Sciöche pro l’elaboraziun di profii dles prestaziuns de basa di ospedai, „nen vara da ciafé na soluziun sostenibla de dorada lungia por garantí tl dagní n’assistënta sanitara por döta la popolaziun.“
rc
