Atualità
Agricoltöra y bosć: Schuler presentëia la Relaziun 2015
La situaziun atuala por ci che reverda l’agricoltöra y i bosć südtirolej é stata tl zënter dla Relaziun agrara y forestala 2015, presentada incö a Balsan.
La Relaziun agrara y forestala contëgn düc i dac ajorná dl 2015 che reverda la situaziun te dui di ciamps plü importanc por l’economia südtiroleja. Le documënt, che vëgn elaboré vigni ann dales Repartiziuns provinziales competëntes, é gnü presenté incö a Palaz Widmann dal assessur Arnold Schuler adöm cun i direturs de repartiziun Martin Pazeller (agricoltöra), Paul Profanter (bosć), le diretur dl Zënter de sperimentaziun dla Laimburg Michael Oberhuber y Martin Unterer, presidënt dla scora profescionala ed economia da ciasa y dl’alimenaziun. „Chësc documënt dëida la politica y l’aministraziun da reconësc les problematiches y les sfidades. L’interpretaziun di dac nes pormët da lauré cun aziuns mirades söl inovaziun y le svilup tl dagní“, á sotligné l’assessur Schuler.
Danter i intervënc bele scomenciá él da ciafé le Program de svilup rural, le pachet cun mosöres por n’anuzamënt sostenibl di produc filosanitars, le Plann d’aziun a bëgn dl’agricoltöra da munt (inrescida y inovaziun), la „Cherta dl Lëgn“ por sostigní la lauraziun y la trasformaziun dl lignan diretamënt te Südtirol y la reorganisaziun dl Zënter dla Laimburg. Les proscimes sfidades sará l’agricoltöra soziala (por ejëmpl cun le reinserimënt de sogec svantajá, mo ince tres proiec didatics – educatifs), la coopreaziun cun i istituc d’archirida, i cambiamënc tlimatics, le svilup dles pastöres y la sconanza dla biodiversité, i gattiker.
La Relaziun tematisëia ince i stüdi y proiec di ofizi, presentëia i dac y les zifres elaborades te na manira tlera y antizipëia les prospetives por le dagní. La Relaziun agrara y forestala 2015 é desponibla debann a Balsan tla sënta dl Palaz provinzial 6 (via Brennero) o tl Palaz Widmann (plaza Silvius Magnago) o pó ince gní desciariada da internet tlican chiló .
rc
Galaria dales fotografies
