Atualità
Dut sun la veles dl cunsëi provinziel tl internet
OSP - Ruvon for plu daujin ala data dla veles dl cunsëi provinziel: la dumënia ai 26 de utober 2003. Duc i particuleresc y la nfurmazions mpurtantes sun la veles possen sën liejer do tla trëi rujenedes provinzieles tla plates dl internet dla Provinzia. Tlo pudran do la veles nce cialé do duc i resultac.
La plates spezieles sun la veles ie metudes adum da nuef pertes. N ti ruva permez tres n link dala prima plata dla homepage proviziela www.provinz.bz.it. Chësta plates sun la veles ie pa drët scëmples da adurvé: sota l pont „Cie vëniel pa lità?“ veniel dat nfurmazions genereles sun la veles, sun l sistem de vela, co che l unirà po spartì su i mandac y sun la grupa de rujeneda ladina te cunsëi provinziel. Chi che possa to pert ala veles y la regules per chëi che ie jic a ste oradeca ie spliegà te na sezion a pert. Mplu giaten nce la nfurmazions sun cë documënc che l ie da to pea a ji a lité y co che n muessa scrì ora la zedula da litè. Ai chemuns ti vëniel metù a desposizion duta la documentazion sun la veles tres chësta plates tl interntet. Nsci ie nce spliegà coche n possa ruvé permez a pudëi cumpedé ora la stimes o a fe l presidënt de sezion eletorela. Chiche ulëssa nfurmazions plu sotes sun la normatives dla veles dl cunsëi provinziel, abina sota la pert „lege y comunicazions“ duc i documënc che l adrova tl format PDF. Dal 30 de setëmber 2003 inant pudran pona sun la plates tl internet dla Provinzia nce cialé do duta la listes di candidac y i partic. Da udëi iel nce i resultac dla veles dl 1998 y n riassunt de duta la veles dal 1948 inant. Chëi che cëla ite tl internet a nchinamei la puscibltà de ti fé dumandes sun la veles al’aministrazion provinziela. La plates spezieles sun la veles tl inernet ie unides metudes adum n culaburazion danter la Provinzia y la Südtiroler Informatik AG.OSP
